Hektisk veke på UiB

Fire ministrar vitjar UiB, og onsdag held statsminister Jens Stoltenberg appell i Egget på Studentsenteret. Det er berre nokre av hendingane denne hektiske veka.

Rektor Sigmund Grønmo deltar på det meste av det som skjer.

- Ja, det vert ganske mange arrangement. Men som rektor er det ikkje uvanleg at det er travle dagar, seier han.

Ministrar og statsminister

Tysdag føreles olje- og energiminister Ola Borten Moe om oljeindustriens tyding for Noreg, behovet for fornybar energi og forskinga si rolle. Gjesteførelesinga som er open for alle er på Dragefjellet, auditorium 2, klokka 11.00-11.45.

Onsdag kan du møta statsminister Jens Stoltenberg i Egget i Studentsenteret i Parkveien 1, onsdag 7. september kl. 14.30. Stoltenberg held appell om demokrati og deltaking. Etter appellen er det opent for spørsmål, kommentarar og debatt.

Seinare på dagen møter forskingsminister Tora Aasland rektor og leiinga ved UiB.

- Me skal ha samtalar om Museumsprosjektet ved Universitetet, seier rektor.

Klokka 13. torsdag inviterer Norsk Tjenestemannslag til eit ope møte på Studentsenteret. Mellom anna skal nestleiar i LO, Tor-Arne Solbakken, delta på møtet med innlegget Hvorfor bruke stemmeretten?

Torsdag klokka 10.00 besøkjer Jonas Gahr Støre Arbeiderpartiets studentlag i Bergen i Auditorium 1 på Dragefjellet. Utanriksministeren skal halda foredraget Å gjøre en forskjell.

Feirer 750 år

Torsdag opnar den internasjonale konferansen: Kongebolig og nasjonalmonument - Håkonshallen 750 år. Konferansen vert arrangert i samband med Håkonshallen sitt 750års-jubileum og finn stad på Bryggens Museum torsdag og fredag. Konferansen er eit samarbeid mellom Jubileumskomiteen for Håkonshallens 750-årsjubileum og Universitetet i Bergen

- Håkonshallen er eit viktig symbol, ikkje berre for den norske staten og Bergen, men også for  den intellektuelle, europeiske tradisjonen som UiB er ein del av og byggjer på, seier Sigmund Grønmo.

Opnar to forskingssenter

Fredag skal Salmon Louse Research Centre opnast. Fiskeri- og kystminister Lisbeth Berg-Hansen kjem for å vera med på opninga av senteret, som i vinter fekk status som eitt av sju nye Sentre for forskningsdrevet innovasjon. Opninga skjer på VilVite-senteret klokka 10.00.

Nok eit senter får si høgtidelege opning på fredag, nemleg Bergen Centre for Competition Law and Economics. Senteret vert etablert med eit ønske om å styrka det konkurransefaglege miljøet i Bergen, og er eit samarbeid mellom Universitetet i Bergen og Norges Handelshøyskole. Ved UiB er det spesielt tilsette ved Det juridiske fakultet og Institutt for økonomi ved Det samfunnsvitenskapelige fakultet som skal samarbeida med NHH-tilsette i det nye senteret.

- Slik eg ser det vil senteret gi høve til å styrka økonomisk og juridisk kunnskapsutvikling og kompetanseoppbygging innan konkurranserett, konkurranseøkonomi og konkurransepolitikk. Senteret vil også  gjera fleirfagleg verksemd innanfor desse forskingsområda, seier rektor Sigmund Grønmo.

Opninga vert markert i klokka 12 Auditorium 1 etg., Ulrike Pihls hus i Professor Keysers gate 1.

Statsråd i Bergen

Feiringa av Håkonshallen fortset i neste veke, mellom anna med mottakingar i det 750 år gamle bygget. Fredag den 16. september skriv ein historie. Då vert det sett statsråd i Håkonshallen. Sist ein sette statsråd i Bergen var i 1906, og det er første gong sidan andre verdskrig at statsrådet samlast utafor hovudstaden.