Konferanse i presang

- Dette er ei gåve som er kjekt å få og kjekt å gi, seier Sigmund Grønmo, rektor ved Universitetet i Bergen.

Gåva han snakkar om er Dannelseskonferansen 2011, som samlar forskarar, studentar og andre deltakarar i Oslo den 8. november. Saman skal dei sjå nærare på universiteta si helsetilstand i byrjinga av det 21. århundret og diskutera kva universitetet bør vera.

Her kan du melda deg på konferansen.

Rektor ved Universitetet i Oslo, Ole Petter Ottesen, er glad for gåva frå universitetet i vest.

- Dette er ei gåve me har store forventningar til, og som me trur vil ha stor inspirasjonskraft, seier Ottersen til uib.no.

Sjå programmet her.

Markerer akademiske tradisjonar

- Når det eldste universitetet i Noreg fyller 200, er det ei viktig markering av dei akademiske tradisjonane i Noreg generelt. Tydinga av danning er heilt sentral for universiteta, saman med utvikling av kompetanse og fagkunnskapane knytta til dei ulike faga. Konferansen skal vera ei drøfting av danning – både i fortida, notida og framtida, seier Grønmo.

Dei to rektorkollegaene skal mellom anna delta i ein paneldebatt, saman med Roger Strand frå UiB, Merle Jacobs frå Lunds Universitet, samt forskar Silvio Funtowics.

Les sak om Dannelseskonferansen på UiO sine sider:
Studentene skal lære mer enn fag

Krav om kvantitative mål

Ottersen er samd med Grønmo i at danning er eit viktig tema å ta opp. 

- Vi ser eit aukande press på universiteta i retning av kvantitative mål, krav om å produsera studiepoeng, publikasjonspoeng og doktorgrader og om å klatra på rangeringar.

 Samstundes skal universiteta ivareta oppgåver som ikkje er så lett å måla, meiner Ottersen. Studentane ved norske universitet skal vera kritiske og etisk reflekterte.

 - Danning kan ikkje realiserast gjennom eit kunnskaps- og kompetansekrav åleine. Å ha eit pensum og sikra kompetanse er sjølvsagt viktig, men vi kan ikkje vedta oss fram til større refleksjon og vidsyn, seier Ottersen.

Berit Rokne, prorektor ved UiB,  sit i Dannelsesutvalget.  Også ho meiner konferansen tek opp eit viktig tema for universiteta.

 - Universitetet si aktivitet er tufta på forskningsuniversitetet sine akademiske verdiar. I dette ligg nyfiken søkjing, kritisk refleksjon og saklig dialog for å strekke seg etter ny innsikt, forståing og akademisk danning. Dei verdiane universitetet bygger på inneber at universiteta reflekterer over sin rolle i samfunnet. Universiteta skal stå for forskingsbasert utdanning der refleksjon, som ein del av kunnskapsutviklinga, er ein føresetnad, ikke minst i lys av dei utfordringane vi står overfor i dag, relatert til klima, helse og velferd, seier Rokne. 

 - Spesiell gåve

Grønmo meiner dei to universiteta har mykje til felles.

- Vi er båe internasjonalt orienterte, har stor breidde og er forskingsuniversitet. Det er gledeleg for UiB som det nest eldste universitetet å overrekkja ei slik gåve til det eldste, seier han.

 - Gjennom "Dannelsesutvalget" samarbeider UiO og UiB om å halda diskusjonen om akademisk danning levande. Det er difor eit flott høve til å markera dette i samband med UiO sitt 200 års- jubileum, seier Rokne.

Ottersen, på si side, gleder seg til å få gåva.

- Dette er nok ein av dei meir spesielle gåvene me får.  Det er ei gåve me har vore direkte involverte i, sidan prorektor sit i Dannelsesutvalget som har stått bak programmet, seier Ottersen.