Dei siste åra har stadig fleire teke til orde for at Noreg må satsa meir på forsking. Me brukar for lite pengar på å skaffa fram ny kunnskap, og har sakka akterut internasjonalt. Det trengst ikkje berre meir pengar og andre ressursar, men at me satsar strategisk på å få fram god kvalitet i forskinga.

Ordninga med Senter for framifrå forsking er eit viktig verkemiddel for å styrka og stimulera alt eksisterande gode fagmiljø slik at dei kan bli endå betre og i stand til å hevda seg internasjonalt. 100 friske millionar kroner i året skal sprøytast inn i 5-10 nye senter for å spissa kompetansen på nokre utvalde område.

Etter ein omfattande kvalifiserings- og uttaksprosess har no 40 kandidatar nådd finalen i SFF-konkurransen. Ni av desse finalistane er frå UiB og ein tiande er eit samarbeidsprosjekt med SNF og NHH, der UiB leiar den eine delen av det planlagde senteret. I denne utgåva av UiB-magasinet vert alle desse presenterte. Dei representerer eit breidt spekter av fagområde, og alle er tverrfaglege.

Finalistane har nyleg sendt av garde meir utfyllande søknader til Forskingsrådet som arrangerer konkurransen. I slutten av juni vert det klart kven som får den ettertrakta statusen. Det som likevel er klart alt no, er at det neppe vert nokon taparar. Prosessen i seg sjølv har vore verdfull for deltakarane, og ei heiderleg pallplassering i dette selskapet er ikkje noko å skamma seg over.

Les mer her.