Det har blitt stadig vanlegare med medisinske forsøk som involverer menneske frå den tredje verda, og det er slett ikkje alltid kompensasjonen står i forhold til risikoen dei tek ved å vera med i forsøka. Professor Reidar K. Lie ved Filosofisk institutt står i spissen for EU-prosjektet CTC-Ethics som utarbeider nye og meir brukarvenlege køyrereglar for medisinsk forsking i utviklingsland. Målet er å auka det etiske medvitet blant politikarar og forskarar i utviklingsland. Også på studiesida er UiB engasjert på dette feltet. Det nye mastergradsstudiet Anvendt etikk vart i fjor etablert i samarbeid med universiteta i Linköping og Aarhus.

Dei siste åra det vora aukande merksemd kring forskingsetikk i Noreg. Både nasjonalt og lokalt vert det no etablert nye forskingsetiske utval som både skal førebyggja og slå ned på tilfelle av fusk i forskinga. – Vi er blitt tvinga til å innsjå at ein òg i forskingssamanheng kan bli freista til å ta snarvegar til suksess, seier professor Bente Alver. Ho er fast medlem av det nyoppretta forskingsetiske utvalet ved UiB og har også delteke i utarbeidinga av forskingsetiske retningslinjer på nasjonalt nivå. Alver har tru på at etableringa av utvala vil føra til klårare medvit om forskingsetiske problem og dermed kan ha ein førebyggjande effekt. I denne utgåva av UiB-magasinet kan du elles lesa om ein studie av muslimske ungdomar i Oslo, om UiB si nye tungrekningsmaskin og om trongen for systematisk kartlegging av faunaen langs norskekysten – og mykje meir.

Les mer her.