Universitetet i Bergen sine hovedsatsings- områder er
marin forskning og utviklings-
forskning

Redaksjon

Valde Bosnia etter studietur

Tidlegare sam.pol.-student Frode Overland Andersen, som no arbeider ved den norske ambassaden i Sarajevo, fekk æra av å opna konferansen om demokrati og menneskerettar i Konjic i sommar. På første benk sat professorane Stein Kuhnle og Dzemal Sokolovic, to av dei tidlegare lærarane hans.

Frode Overland Andersen har hovudfag i samanliknande politikk og jobbar no som førstesekretær ved ambassaden i Sarajevo.

Frode Overland Andersen (30) var ein av 14 studentar ved Institutt for samanliknande politikk som i 1997 drog på studietur til Bosnia saman med Dzemal Sokolovic.

– Sju av oss arbeider i dag med Balkan på fulltid, fortel Frode, som tek seg tid til ein liten prat med UiB-magasinet innimellom møte, rapportskriving og andre oppgåver på ambassaden.

Karrieren i utlandet starta med jobb som politisk analytikar for Sfor (Nato-styrken i Bosnia) sommaren 1998.Våren 1999 gjorde han ferdig hovudoppgåva; ein samanliknande studie av overgangen til demokrati i seks aust- og sentraleuropeiske land. Så starta han på aspirantkurset i Utanriksdepartementet, og fekk etter endt teori og praksisperiode der jobb ved ambassaden i Sarajevo i august i fjor.

Men ambassadelivet er ikkje berre fine mottakingar og glamour.

– Du skal vita kva du gjer.Det er mykje arbeid,men det er spennande. Særleg når ein arbeider ved ein mindre ambassade får ein mange varierte oppgåver. Ein får gjera meir, og får også meir ansvar, seier Frode.

Han er nøgd med utdanninga frå Sam.pol., og synest innhaldet i hovudoppgåva er relevant for jobben han har i dag. Men han er ikkje sikker på om han hadde teke hovudfag om han skulle valt om igjen i dag. Eigentleg hadde han tenkt å forska vidare,men fekk ikkje stipend. I staden vart det altså utanrikstenesta og tre års-kontrakt i Bosnia. Og snart snakkar han språket flytande?

– Det er veldig vanskeleg. Sju kasus og alt er uregelmessig. Men eg går på språkkurs, og det går framover i alle fall, seier Frode.

 

Bosnia-Hercegovina er eitt land som etter krigen og Dayton-avtalen består av to delar (entitetar); ein bosniak-kroatisk føderasjon og ein serbisk republikk som er om lag like store. Dei to delane har eigne administrasjonar og byråkrati på fleire nivå, men Bosnia vert framleis styrt av det internasjonale samfunnet, representert ved det såkalle OHR (Office of the High Representative), som skal iverksetja dei sivile delane av Dayton-avtalen. OHR koordinerer arbeidet til fleire FN-organisasjonar, EU, SFOR, Verdsbanken og Osce m.fl. Bosnia har hatt fleire val etter krigen, men oppslutnaden om dei politiske institusjonane er dårleg. Meir info på www.ohr.int.