Universitetet i Bergen sine hovedsatsings- områder er
marin forskning og utviklings-
forskning

Redaksjon

Sommaren med Wittgenstein

To professorar frå Bergen organiserer Europas største permanente filosofikonferanse, Kirchberg-symposiet, i Austerrike i sommar. Wittgensteinarkivet i Bergen skal for første gong presenterast i ein større internasjonal samanheng.

– Dette er eit døme på at Bergensmiljøet har stor tillit i det internasjonale filosofsamfunnet, seier Kjell S. Johannessen, som har hovudansvar for konferansen saman med Tore Nordenstam.

Dei to professorane ved Filosofisk institutt har vore sentrale i etableringa av Wittgenstein-arkivet i Bergen. Symposiet i Kirchberg har utgangspunkt nettopp i navnet og forskinga til Ludwig Wittgenstein. Eit ganske stort utval av leiande filosofar i verda deltek på årets utgave av konferansen.

Wittgenstein-symposiet blir arrangert for attende gang i år. Det er det austerrikske Ludwig Wittgenstein-selskapet som står bak konferansen i Kirchberg, som ikkje er tilfeldig valgt som vertsstad.

– Kirchberg er ein liten landsby, nøyaktig ti mil rett sør for Wien, og den er valt som konferansestad fordi den ligg midt mellom to landsbyar der Wittgenstein praktiserte som skolelærar på tjue-talet, opplyser Johannessen.

Universitetet i Bergen har markert seg som eit av sentra i Wittgenstein-forskinga i verda. Wittgenstein-arkivet har vore sentralt i så måte. Arkivet si hovudoppgåve er å omsetje filosofens handskrevne materiale til maskinformat. Det vil lette all internasjonal forsking på området enormt. Wittgenstein-arkivet blei i 1993 evaluert av ein internasjonal komite, og fekk då særskilt rosande omtale. Særleg dataprogramvara som er utvikla til å søke i arkivet med, vekte oppsikt. På symposiet i sommar skal det vere ein eigen workshop som tek for seg arkivet.

Bidraga til dei inviterte innleiiarane skal redigarast av Johannessen og Nordenstam etter konferansen. Eit utval av dei skal bli gitt ut i den kjente skriftserien til det austerrikske Wittgenstein-selskapet, seier Kjell S. Johannessen, som innrømmer at det av og til har vore slitsamt med all organiseringa, når brevveksling, telefonering og faxing har tatt heile arbeidsveker.