Mange karrierevegar for studentar på framandspråk

Kandidatar med framandspråk hamnar mellom anna på kontor som dette.

Intervjua syner at det er stor variasjon i kva vegar framandspråkstudentar tar ut i arbeidslivet, og at studia i stor grad er relevant i jobbane dei får. 

Mange moglegheiter med språk

Kjellfrid Reite, som har mastergrad i engelsk, har alltid meint at språkstudium opnar for mange moglegheiter så lenge ein sjølv er open og har innsatsvilje. Ho rår framandspråkstudentar til å gripe dei sjansane som kjem og få røynsle med fleire jobbar, før ein landar på noko meir langsiktig. Ho jobbar no hovudsakleg med omsetjing for to firma i tillegg til at ho er lærar i akademisk skriving.

Å velje ei utdanning som i seg sjølv ikkje er yrkesretta kan gjere det vanskeleg å vite kva type jobbar ein kan søkje. Masterkandidat i russisk, Malin Dahlberg, meiner at dette kan vere ein føremon. – Det fører kanskje til at ein leiter breiare og dermed endar opp i ein utruleg spanande jobb, som ein ikkje ein gong visste fanst! seier kommunikasjonsrådgjevaren i sitt intervju.

Relevant utdanning

Men det òg finst døme på at språkutdanninga er direkte relevant for jobben ein får. For masterkandidat i spansk språk og latinamerikastudium Hanne Krogstadmo var temaet for masteroppgåva og kunnskapen om språket, regionen og kulturen utslagsgjevande då ho fekk jobben som programkoordinator i Regnskogfondet. Ho er ansvarleg for organisasjonen sine prosjekt i Bolivia og Peru. Det same var tilfelle for Kristin Løyning Narozanski, som har same mastergrad. Ho har fått draumejobben på Costa Rica sin ambassade i Oslo, eit land ho har utvikla eit nært forhold til gjennom utvekslingsopphald i studietida.

Målet med prosjektet ’På jobb med framandspråk’ er å synleggjere yrkesvegar kor språk er relevant. Konklusjonen så langt er at kandidatar med bakgrunn i framandspråk kan brukast i eit mangfald av bransjar og sektorar, frå utdanningssektoren til det private næringslivet. Den raude tråden er kommunikasjon. Du kan lese meir om alumnane og deira karrierevegar ved å følgje denne lenka.