Arbeidstid, ferie, fråvær og sjukdom

Arbeidstid, registrering og overtid

Universitetet sentralt har sendt ut ei orientering om retningslinene som gjeld for registrering av arbeidstid og bruk av overtid for tilsette ved UiB. Brevet frå UiB og dei aktuelle retningslinene ligg i ePhorte på saksnummer 11/4819.

Nedanfor følgjer nokre hovudpunkt til orientering. Dei som ønskjer meir inngåande kunnskap, må lesa dei vedlagde retningslinene. Ta kontakt med administrasjonen for eventuelt å få ei utskrift av retningslinene.

(1) STILLINGSTYPAR
IF har tre hovudkategoriar av stillingar:

A)Tilsette med variabel dagleg arbeidstid (fleksitid). Dette gjeld for administrasjonen.

B)Tilsette i særleg ubunden stilling ("særlig uavhengig stilling"). Dei aller fleste vitskapleg tilsette ved UiB høyrer til i denne gruppa. Kjenneteiknet ved kategorien er at den enkelte i stor grad "prioriterer sine oppgaver, når arbeidet skal utføres og hvordan arbeidet skal utføres". Etter UiBs oppfatning er følgjande stillingskategoriar normalt særleg ubundne: professorar, førsteamanuensar, postdoktorar og stipendiatar.

C)Stillingar som må vurderast individuelt. Detter er stillingstypar som kjem i ein mellomposisjon, og her seier regelverket at desse skal vurderast individuelt: "Om den enkelte arbeidstaker i disse stillingene faller inn under det rettslige begrepet særlig uahvhengig må vurderes av leder ut frå de konkrete individuelle omstendigheter". Denne mellomgruppa er hjå oss førstelektorar, universitetslektorar, vitskaplege assistentar og tilsette i kategorien "forskar". Inntil vidare vurderer instituttet desse som særleg ubundne på linje med gruppa under B over. Dersom nokon ønskjer ei vurdering av dette for si eiga stilling, bed vi om at dei tek kontakt med administrasjonssjef eller instituttleiar. 

(2) REGISTRERING AV ARBEIDSTID
A) Tilsette med fleksitid (administrasjonen) registrerer dagleg arbeidstid i eit eige skjema.

B) Tilsette i særleg ubundne stillingar (vitskapleg tilsette) treng ikkje registrera arbeidstid.

C) Stillingar som kjem i ein mellomposisjon, skal registrera arbeidstid dersom dei ikkje blir vurderte som særleg ubundne.

(3) OVERTID
Overtid skal alltid vera eksplisitt pålagt av instituttleiar eller administrasjonssjef, og kan berre påleggjast ved ekstraordinære behov. I tillegg gjeld det detaljerte reglar for kor mange timar overtid ein kan arbeida (jf retningslinene).

Arbeidstakarar i særleg ubundne stillingar har som hovudregel ikkje rett til overtidsgodtgjersle (jf retningslinene del II, pkt 2 for meir utfyllande informasjon).

(4) HONORAR FOR ARBEID UTOVER FULL STILLING
Dette er noko anna enn overtid. Viktigaste skiljet er at overtid er knytt opp til ekstraordinære behov og honorert etter eigne og høgare satsar.

Å betala ut ekstrahonorar til tilsette i full stilling for oppgåver som ikkje kan reknast som overtid, har vi ikkje lov til. Dette gjeld for tilsette i både administrative og vitskaplege stillingar. Nærare informasjon om dette er sendt ut til alle ved Institutt for framandspråk 17. mars 2011 ("Honorar i tillegg til full stilling").

(5) TIDSROM FOR UNDERVISNING
Den arbeidstida som vert styrt av andre enn arbeidstakaren sjølv, t.d. undervisningstider, skal i den grad det er mogleg leggjast innanfor tidsrommet mellom 7.00 og 17.00 måndag til fredag. Når oppgåver er lagt utanfor dette tidsrommet, slik det t.d. er tilfelle med mykje av vidareutdanninga, har undervisaren rett til eit mindre tillegg pr time. Administrasjonen følgjer opp dette for vidareutdanninga. Andre som meiner dei har krav på dette tillegget, må kontakta Kristin.  

Vidare spørsmål kan rettast til administrasjonskonsulent Kristin Skogedal eller administrasjonssjef Arve Kjell Uthaug, eventuelt også til personal- og organisasjonsavdelinga ved UiB.

Fleksitid for administrativt tilsette

Dei administrativt tilsette ved instituttet har fleksitid, praktisert i tråd med retningslinene ved UiB. Frammøteprotokoll skal leverast inn til administrasjonssjefen etter kvar månad.

Ferie

Alle skal melda frå om ferietidspunkt til Kristin Skogedal (tlf 82367). Det blir kvart år sendt ut informasjon om når sommarferien skal meldast inn, og ferielista til instituttet skal vera klar seinast 1. mai. Søknader om overføring av ubrukt ferie til neste år skal sendast Skogedal før utgangen av året. Det same gjeld søknader om å ta ut delar av neste års ferie på forskot.

Personal- og organisasjonsavdelinga ved universitetet har meir informasjon om retningslinene for ferie og ferieavvikling.

Fråvær

Alle som har full stilling ved instituttet, skal vera til stades på instituttet dei vanlege fem arbeidsdagane i veka. Det finst tre unntak:

• Ved kortare fråvær på inntil nokre få dagar til konferansar o.a. skal det meldast frå til Anne Hestnes i ekspedisjonen (82340).
• Ved fråvær på over ei veke, skal det søkjast administrasjonssjef Arve Kjell Uthaug på e-post.
• Heimekontor kan berre tildelast etter søknad til instituttleiar Leiv Egil Breivik. Søknaden skal grunngjevast. Krevjande instituttverv som gjer det ønskjeleg å skjerma ein dag i veka til andre arbeidsoppgåver, kan vera ein grunn til å få heimekontor.

Reglane ovanfor vil bli praktiserte litt annleis når folk har forskingstermin. Her er det tilstrekkeleg å melda frå til Hestnes når ein er borte, og avtala eventuell bruk av meir fast heimekontor i perioden med instituttleiar.

Lege, tannlege og helsestasjon

Det blir gitt fri med løn til naudsynte besøk hjå lege eller tannlege, etter avtale med overordna. Det same gjeld dersom ein skal følgja barn til lege, tannlege eller helsestasjon.

Seniorpolitiske fridagar og ekstra ferieveke

Alle arbeidstakarar har etter fylte 60 år rett på ei ekstra ferieveke (5 arbeidsdagar).

Arbeidstakarar får frå og med året dei fyller 62, i tillegg til denne ekstra ferieveka òg ti seniorpolitiske fridagar. Seniordagane må takast ut som feriedagar, og - i motsetnad til annan ferie - kan dei ikkje overførast til neste år. Heilt unntaksvis kan ein få utbetalt løn for desse dagane, og dette må i så fall avklarast gjennom søknad til instituttleiinga ved administrasjonssjefen i god tid før årsskiftet.

Sjukefråvær

Ved sjukefråvær skal du snarast råd melda frå til administrasjonskonsulent Kristin Skogedal (tlf 82367). Dette gjeld både fråvær med sjukmelding og fråvær med eigenmelding. Hugs å opplysa om du har undervisning som må avlysast eller utsetjast. Skogedal melder i så fall vidare til fagkoordinator og undervisningskonsulent. Fagkoordinator har ansvaret for å finna vikar der det trengst. Undervisningskonsulenten informerer studentane om timeplanendringar gjennom Mi side, felles-epost til studentane på emnet og eventuelt oppslag på døra inn til undervisningslokalet.

Ved kortare sjukefråvær med eigenmelding legg Skogedal eit eigenmeldingsskjema i posthylla til arbeidstakaren, som skal fylla det ut og returnera det til Skogedal snarast råd. UiB praktiserer inkluderande arbeidsliv, og alle arbeidstakarar har difor 24 eigenmeldingsdagar innanfor ein 12 månaders periode. 8 dagar kan takast i samanheng, men etter dette krevst det sjukmelding frå lege. Dei som har omsorg for born, har i tillegg 10 dagar per kalenderår eller 15 dagar per kalenderår dersom ein har 3 eller fleire born.

Sjukmelding skal leverast eller sendast instituttet ved Skogedal så snart som råd.

Spørsmål om eigenmelding, sjukmelding, Inkluderande Arbeidsliv (IA), oppfølgingsplanar, fråvær med sjukt barn o.a. kan rettast til Skogedal.

Instituttet kan ikkje ta på seg ansvaret for eventuelle feil i informasjonen over. Dersom nokon finn feil og manglar i informasjonen, er vi takknemlege for å få vita dette slik at vi kan retta det opp.