GAMUT - Griegakademiets senter for musikkterapiforskning

Mål

GAMUT (Griegakademiets senter for musikkterapiforsking)  arbeider for å:

• sikre adekvat kunnskapsutvikling innan universitetsfaget musikkterapi
• utvikle samfunnsrelevant kunnskap om samanhengar mellom musikk, helse og utvikling, for bruk i m.a. helsevesenet, sosialtenesta, skulesektoren og kultursektoren.
• utvikle eit norsk musikkterapeutisk forskingssenter på høgste internasjonale nivå

GAMUT arbeider aktivt både med forsking og forskingsformidling, og tilbyr også kurs og rettleiing. Forskingsaktiviteten fokuserer både på undersøkingar av profesjonell musikkterapi og på helseaspekt ved ålmenn musikkbruk i samfunnet. Når det gjeld forskingsformidling, er GAMUT ein sentral aktør med ansvar for to internasjonale musikkterapi­tidsskrift, det verdsomspennande elektroniske tidsskriftet Voices: A World Forum for Music Therapy  www.voices.no og det vitskaplege tidsskriftet Nordic Journal of Music Therapy  www.njmt.no  .

Både masterstudentar og PhD-kandidatar ved Griegakademiet er knytt til ulike prosjekt. Senteret baserer seg elles på eit tett samarbeid mellom UiB og Unifob helse.

Hovudområde for forsking er:

-          Musikkterapi og psykisk helsearbeid

-          Musikkterapi i kriminalomsorg

-          Musikkterapi i eldreomsorg

-          Musikkterapi i medisinsk rehabilitering

-          Musikkterapi i pedagogiske kontekstar

-          Samfunnsmusikkterapi

Musikkterapi og psykisk helsearbeid

I mange land er musikkterapi i psykisk helsearbeid eitt av dei største arbeidsfelta innan musikkterapien. Slik er det førebels ikkje i Noreg, men fagmiljøet ved GAMUT har dei seinare åra bidrege med internasjonalt orientert forsking som dokumenterer effekten av musikkterapi i psykisk helsearbeid og som også utforskar klientar si oppleving av ei ressursorientert musikkterapitilnærming. Forskingsfeltet vert utvikla i samarbeid med fleire regionale fagmiljø i Noreg og dessutan Wagner-Jauregg Landesnervenklinik, i Linz (Austerrike) og National Music Therapy Research Unit, ved University of Melbourne (Australia).

Musikkterapi i kriminalomsorg

Dette praksisfeltet er under utvikling og GAMUT har dei siste åra gjennomført ei pilotundersøking som vert ført vidare til nye delprosjekt. Dette forskingsfeltet vert utvikla i samarbeid med Kriminalomsorgen Vest, Kompetansesenter for sikkerhets-, fengsels- og rettspsykiatri, Helse Bergen, og Forensic Research Group ved Psykologisk fakultet, UiB.

Musikkterapi i eldreomsorg

Eldreomsorga vil i framtida truleg verte eitt av dei største og viktigaste praksisfelta i musikkterapien. GAMUT etablerte i 2008 "Nettverket musikk og eldre"  www.nmoe.no. Nettverket involverer forskarar frå ei lang rekkje institusjonar i Danmark og Noreg og har den doble mål­setjinga om å stimulere til ny og betre praksis og ny og betre forsking på feltet. Sentral samarbeidspartnar i høve til oppbygging av dette forskingsfeltet er Senter for omsorgsforskning, Vest.

Musikkterapi i medisinsk rehabilitering

I samarbeid med fagpersonar ved Haukeland universitetssykehus byggjer GAMUT opp pilotprosjekt i høve til musikkterapi som medisinsk rehabilitering, t.d. i høve til Parkinson- og afasipasientar.

Musikkterapi i pedagogiske kontekstar

Svært mange norske musikkterapeutar arbeider i skule og barnehage. Førebels er det likevel mindre forsking på dette praksisfeltet enn på mange andre felt innan musikkterapien. Dette ønskjer GAMUT å gjere noko med og vi har m.a. signert ein samarbeidsavtale med Fagavdeling barnehage og skole, Bergen kommune, om utvikling av musikkterapeutisk forsking og prosjektarbeid på det pedagogiske området.

Samfunnsmusikkterapi

Samfunnsmusikkterapien har fokus på vilkår for samfunnsdeltaking og ser på musikk som ein helseressurs i ulike kvardagssamanhengar. Dette feltet er ein del av GAMUTs profil og vert utvikla i samarbeid med aktuelle kulturfaglege, helsefaglege, pedagogiske og samfunnsfaglege miljø.

Medarbeidarar

 http://www.unifobhelse.no/persons.aspx?ci=202

 Prosjektportefølje

 http://www.unifobhelse.no/projects.aspx?ci=112