Travel november for Griegakademistudentar

Griegakademiet Foto: Jan Kåre Wilhelmsen

Wagner

Først ut er Wagners Den Flygende Hollender, eit samarbeid mellom Bergen Filharmoniske Orkester og Den Nye Opera. Her deltek studentar frå Griegakademiet i operakoret, og tidlegare student Håkon Matti Skrede er kormester. Det skal ha vore ei sjøreise utanfor norskekysten i full storm som inspirerte Richard Wagner til å komponere verket i 1841. Operaen har premiere laurdag 1. november, og vidare oppsetningar 3., 5., og 7. november.

Messiaen

Seinare i månaden kjem musikarar frå Tsjaikovskijkonservatoriet i Moskva til Bergen for å delta i Olivier Messiaens Des canyons aux etoile, saman med Forsvarets Musikkorps Vestlandet og Einar Røttingen på klavér. Sistnemnde har gjort ein heil Messiaen-serie og er å rekne som ekspert på komponisten. Vidare deltek studentar frå Griegakademiet på strykarar, fløyter og slagverk.

Dette verket er svært sjeldent oppført, då det krever store ressursar og er vanskeleg å gjennomføre. Det er med andre ord ein gylden anledning til å få med seg eit av Messiaens siste verk. Det vart skrive til 200-årsjubileet for den amerikanske sjølvstendeerklæringa og er inspirert av eit opphald i Utah-ørkenen i 1972 - fargar, vind og fuglar frå ørkenen er alle tilstades i musikken. Konserten finn stad i Korskyrkja 14. november kl. 19.30.

Verdi

Så, i slutten av månaden, har turen kome til Verdis Requiem, skrive til minne om forfattaren Alessandro Manzoni og uroppført i 1874. Også her medverkar Griegakademiets kor og Håkon Matti Skrede er kormester. Andrew Litton dirigerar og Victoria Nava syng sopran. Verket blir oppført 26. og 27. november.

Griegakademiet, inngangsparti Foto: Jan Kåre wilhelmsen