Kulturell Uorden vert fjernsynsserie
Ei fjernsynsserie basert på forskingsprogrammet Kulturell
Uorden er under konkret planleggjing. Serien vil truleg få tildelt
beste sendetid på NRK 1. Manuset, som er under bearbeiding av professor
Jostein Gripsrud, skal etter planen vera ferdig i løpet av våren
2000, og opptaka vil truleg starta nokre månader seinare.
Gripsrud er initiativtakar både til forskingsprogrammet og fjernsynsserien.
Han vil òg vera sentral som deltakar i programmet, der han skal
ha ein programleiarfunksjon.
-– Fjernsynet er jo spesielt godt egna for ei personleg formidling
av stoffet. Ettersom eg har lang trening i å undervisa og å
snakka til folk, vil eg nok kunne bidra positivt i den samanhengen, seier
Gripsrud. Han trur dessutan at fjernsynet i større grad enn tidlegare
ønskjer å nytta vitskapsfolk framføre profesjonelle
programleiarar i denne typeseriar.
– Eg trur òg at sjølve temaet Kulturell Uorden
vil ha mykje igjen for å verta framstilt
på ein estetisk måte, altså gjennom bilete på
fjernsynet, legg professoren til.
Eit krevjande prosjekt
Heilt frå begynninga, då det vart søkt om økonomiske
middel frå Forskingsrådet, har det vore meininga at det skulle
utarbeidast ei fjernsynsserie i tilknytning til Kulturell Uorden-prosjektet.Gripsrud
meiner det er eit utfordrande arbeid han har teke fatt i.
– Det er svært vanskeleg å uttrykkja seg kort og konsist
om eit så stort prosjekt. Som forskar er eg jo vand til å skriva
mykje meir omfattande, og for eit smalare publikum. I desse programma vil
målet vera å nå ut til flest mogeleg, ikkje berre til
sjåarar med universitetsbakgrunn. Dette innebærer eit sterkt
behov for forenkling og tilspissing av stoffet for å gjera det meir
tilgjengeleg, seier han. Gripsrud ser likevel for seg at størsteparten
av dei som kjem til å følgja programma vil vera generelt kulturinteresserte
menneske.
Tre program
Den nye serien vil omfatta tre program på ca 50 minutt. Kvart
av dei vil ta føre seg dei tre hovudproblemstillingane i forskingsprogrammet;
Forholdet mellom kunst og populærkultur, mellom vestleg og ikkje-vestleg
kultur og forholdet mellom estetiske fenomen og forståingsmåter
på ikkje-estetiske område. Gripsrud meiner at problematikken
som er knytt til Kulturell Uorden-prosjektet er noko som angår mange.
– Både når det gjeld utforming av livsstil, reklame og
generelle politiske og samfunnsmessige prosessar vil forskingsprogrammet
kunne medverka til nye innfallsvinklar. Særleg i høve til
globaliserings-problematikken vil dette vera aktuelt, understrekar den
kommande programleiaren.
NRK produserer
Etter den foreløpige planen skal programma verta sendt våren
år 2000. Det er NRK Hordaland som vil stå for produksjonen,
og serien vil verta den tredje i rekkja av vitskapsprogram produsert av
denne kanalen i løpet av dei siste åra. Redaksjonssjef i fjernsynsavdelinga,
Kjell Jarle Høyheim, seier at dette er ei medviten satsing.
– Eg er overtydd om at det er svært mykje godt stoff i universitetsmiljøa,
og vi er absolutt interessert i samarbeid for å laga gode program.Jostein
Gripsrud sin idé er spennande, og når vi til tross for at
prosjektet er både dyrt og arbeidskrevjande, vel å gå
inn for det, er det fordi at vi trur at det vil fanga mange sjåarar.
Dette er òg årsaka til at vi vurderer å gje programmet
ei svært god sendetid.
Artikkelen er hentet fra AGENDA
nr. 1 2000, nyhetsblad fra Institutt
for medievitenskap, UiB