Norrøn filologi

Norrøn filologi er studiet av norrønt språk, norrøn litteratur og norrøn kultur. Norrønt er "Det gamle Sprog", slik det vart talt og skrive her til lands i mellomalderen. Men ikkje berre her - norrønt er ein fellesnemnar for språket og litteraturen i både Noreg og Island, og dessutan vesterhavsøyane. I dette området kan vi snakke om ein felles språkleg og litterær kultur som varte frå landnåmet av Island til seinmellomalderen, i drygt 500 år.

Ved Universitetet i Bergen vart faget oppretta med utnemninga av Ludvig Holm-Olsen som professor i norrøn filologi i 1953. For tida er det ein professor i norrøn filologi som har arbeidsplass ved Institutt for lingvistiske, litterære og estetiske studium, Odd Einar Haugen, og ein som har arbeidsplass ved Senter for mellomalderstudiar (CMS), Else Mundal. I tillegg har instituttet og senteret fleire forskarar i norrøn filologi som også gjev undervisning. I haustsemesteret 2011 er dette Eldar Heide, Kristel Zilmer og Bergsveinn Birgisson. Helen Frances Leslie har ikkje undervisning i haustsemesteret 2011, men hadde seinast eit kurs vårsemesteret 2011. Det same hadde Hilde Stoltz, som nyleg tok mastergrad i norrøn filologi ved UiB.

Fagmiljøet i norrøn filologi ved Universitetet i Bergen har lenge vore aktivt i produksjonen av læremiddel, både grammatikkar, tekstsamlingar og handbøker.