Forsking og fakta til folket!

Forskarskulen i klinisk medisin presenterer kva dei forska på i 2011

Arrangementet heiter «Forskingspresentasjonar frå 2011» og er i regi av Forskarskulen i klinisk medisin. Her skal forskarane fortelje omverda kva dei har funne ut i løpet av fjoråret, og menyen er variert.

Posterutstilling der folk ferdast

Heile veka blir det posterutstilling i foajeen på Haukeland Universitetssjukehus. Pasientar, tilsette og andre interesserte kan komme og bli klokare. Det er mange tema å boltre seg i, alt frå diabetesforsking til beinmarg til kva ein eigentleg kan finne ut ved hjelp av nye ultralydteknikkar.

Inga-Cecilie Sørheim er leiar i arrangementkomiteen. -Eg trur at hovudmotivasjonen for unge forskarar er sjansen til å formidle eigne resultat til kollegaer og eit større publikum, seier ho. – I tillegg kan ein knyte nye kontakter og bli ein del av eit større forskingsfelleskap.

Torsdag 26. januar skal forskarane ha munnlege presentasjonar. Det skjer i Stort Auditorium på Haukeland Universitetssjukehus (3. et), og alle som vil kan komme og høyre på.

Prisutdeling

Veka avsluttast med gjeve prisar til dei beste forskingsbidraga på fredag.

Inga-Cecilie Sørheim gler seg. -Eg ser mest fram til å treffe forskarar frå mange ulike forskingsmiljø og sjå breidden i det som blir presentert, fortel ho.

-Totalt har vi fått inn 42 postarar og 19 munnlege presentasjonar, og eg gler meg til å møte forskarane ansikt til ansikt på posterrunden med juryen onsdag og under dei munnlege presentasjonane torsdag.

Heimesida til Forskarskulen i klinisk medisin finn du her

Forskarskulen har årleg prisutdeling for beste poster og beste munnlege presentasjon. Her vinnarane frå 2010. Foto: Jørgen Barth