Hjem
Lektorutdanning
Vitnesbyrd

PPU gir fleire moglegheiter

Solfrid Hernes har mastergrad i spansk språk og latinamerikastudium, og har også studert sosialantropologi. Etter masteren tok ho praktisk-pedagogisk utdanning. - Det var veldig lærerikt, både med faga i didaktikk og pedagogikk.

Solfrid Hernes har tatt PPU ved UiB.
Foto/ill.:
Privat

Hovedinnhold

- Kan du fortelje litt om studieløpet ditt?

Eg byrja å studere i 2005 og fullførte bachelorgraden min i språk i 2008. Eg studerte spansk, og tok også fag i sosialantropologi. I løpet av bachelorgraden reiste eg også på utveksling til Costa Rica i eitt semester, det var ei kjekk oppleving. I 2009 byrja eg på masterprogrammet i spansk språk og latinamerikastudium. På master kunne vi velje mellom å fordjupe oss i litteratur, kultur og språk. Eg synst særleg språk er interessant, og valde derfor å skrive ei lingvistisk oppgåve. I masteroppgåva mi gjorde eg ei komparativ undersøking av chilensk og norsk ungdomsspråk.

- Kvifor bestemte du deg for å ta PPU?

Eg hadde tenkt på å bli lærar, og eg tenkte også på andre yrke der pedagogikk kjem godt med. Ein står breiare når ein har PPU, og eg meiner at det har gitt meg fleire moglegheiter.

- Kan du fortelje litt om korleis det er å ta årsstudium i praktisk-pedagogisk utdanning?

Det var veldig lærerikt, både med faga i didaktikk og pedagogikk. Vi fekk god oppfrisking i faga våre i løpet av PPU. I didaktikkfaga lærte vi mykje spesifikt om korleis ein skal gå fram til dømes når ein skal leggje opp undervising og arbeidsmåtar. Det var veldig nyttig. PPU var ganske annleis frå det å gå på master, mellom anna ved at vi hadde fleire arbeidskrav og oppgåver i løpet av året. Vi fekk også moglegheita til å velje litt mellom munnleg og skriftleg vurderingsform i didaktikkfaga. 

Vi var i praksis i 7-8 veker, både om hausten og våren. På PPU har ein praksis både i ungdomsskulen og den vidaregåande skulen. Når vi er i praksisperiode blir vi følgt opp av ein rettleiar, og vi samarbeider med ein praksispartner. I utgangspunktet hadde eg ikkje trudd at eg kunne tenkje meg å arbeide i ungdomsskulen, men det var ei veldig positiv oppleving å vere i praksis der. Det var ein veldig engasjert klasse vi underviste. Praksis i den vidaregåande skulen var på eit vis meir utfordrande. Samfunnskunnskap er eit stort fag der, og det er meir fokus på å lære teorien og at ein må grunngi standpunkta sine.

- Kva arbeider du med no som du er ferdig utdanna som lektor?

Eg arbeider som privatistlærar i spansk ved Akademiet i Bergen. Det er kveldsundervising og eit intensivt opplegg. Det er kjekt å kunne følgje opp elevar her frå starten og sjå kor mykje dei lærer. Med denne jobben får eg også opprettheldt spansken min. Eg arbeider også i Hero i Bergen med jobbsøkjarkurs og munnleg språktrening for innvandrarar. I dette arbeidet får eg god bruk for bakgrunnen min frå sosialantropologi og erfaringane eg har med meg frå å vera på utveksling sjølv. No skal eg snart byrje i ny stilling som ungdomsrådgivar i NAV. 

- Har du nokre erfaringar eller råd å gi til andre som er interesserte i å ta PPU?

Viss du er tidleg i studieløpet er det lurt å vurdere å ta eit årsstudium i eit anna fag som ein del av bachelorgraden din. Du må nemleg ha to fag for å kunne ta PPU her. Tenk over kva du er interessert i og kva du vil arbeide med etter studiane. Eg trur ein står mykje friare og har fleire moglegheiter etter at ein har tatt PPU. Det er også lurt å ha frivillige verv i løpet av studiane. Det er kjekt, og det er ein stor fordel når ein skal søkje jobb etterpå. Sjølv blei eg med i Flyktningguiden og er framleis aktiv der, det er ein del av Røde Kors.