Nedsett funksjonsevne er berre opplevd

Professor II Børge Sivertsen forskar på insomni ved Det psykologiske fakultet.

Det er professor II Børge Sivertsen ved Det psykologiske fakultet som melder denne gledelege oppdaginga til nettavisa På Høyden.

- Det var overraskande ikkje noko skilnad i prestasjon på dei nevropsykologiske testane mellom dei som hadde insomni og dei utan. Eldre med insomni rapporterte likevel subjektivt dårleg minne og meir symptom på depresjon enn eldre utan insomni, fortel Sivertsen.

Funnet vart gjort på eit forskingsprosjekt leia av professor Astri Lundervold ved Institutt for biologisk og medisinsk psykologi, der målet var å kartleggje korleis eldre insomnipasientar presterer på dagtid. Resultata av nevropsykologiske testar vart samanlikna med pasientane si subjektive oppleving av dagtidfunksjon, og synte at dei kjente seg meir utsett for depresjon og dårleg minne enn det dei objektivt sett presterte på testane.

Sivertsen meiner likevel at gruppa som opplever nedsett funksjonsevne likevel må takast på alvor, sjølv om det ikkje er funne bevist for objektivt målt nedsett dagtidsfunksjon.
- Vi må passe oss for å ikkje stigmatisere gruppa med insomni. Det er ei reell fare for psykologiske plager for dei som lid av søvnproblem, seier han til På Høyden.

I følge Sivertsen tyder tidlegare undersøkingar på at det kan vere vanskelegare for personar med insomni å gjennomføre svært komplekse oppgåver. Neste steg i forskinga er derfor å finne ut kor grensa går før søvnproblema spelar inn.

Les heile saka hjå UiB si nettavis På Høyden.