Avslutningsseremoni - starten på noko nytt

Full sal på avslutningsseremonien for kandidatane som avla høgare grad ved Det psykologiske fakultet 21. juni 2013. Foto: Ingunn Voster

Dekan Jarle Eid overrakte kvar einskilt kandidat sitt velfortente vitnemål. Foto: Hanne Solheim

Psykologkandidat Ole Magnus Vik stod for studentane sin tale på avslutningsseremonien. Foto: Hanne Solheim

Seremonien inneheldt talar frå dekan og studentane sin representant, musikk av Griegakademiet og ikkje minst utdeling av vitnemål. Kandidatane var invitert til å ta med seg gjester, noko som sørga for at Egget i Studentsenteret var fullsatt under heile markeringa. Nokre gjestar kom eins ærend heilt frå Bangladesh for å få med seg den høgtidlege hendinga.

Nye utfordringar ventar

Markeringa vart innleia med tale frå dekan Jarle Eid, som synte til kva som har skjedd i samfunnet i løpet dei 5-6 åra kandidatane har brukt på utdanninga si, mellom anna bybanebygging og finanskrise i Europa. Eid haldt med dette fram at ein aldri kan vite kva som kjem til å skje i framtida, og at utdanning berre er eitt av mange steg i livet, men at dei som var samla til markering i dag hadde greidd å fullføre eit langt utdanningsløp og no var klare for det neste steget. Dette var òg eit poeng i psykologkandidat Ole Magnus Vik sin avrundande tale, som oppmoda sine medstudentar til å gjere si stemme høyrt i arbeidslivet og peika på at nye utfordringar no venta.

Høgtidleg utdeling av vitnemål

For mange var nok utdelinga av vitnemål eit høgdepunkt i seremonien. 100 kandidatar fordelt på sju studieprogram kom fram og fekk vitnemålet på fullført høgare grad av dekanen. I tillegg til profesjonsstudiet i psykologi og praktisk pedagogisk utdanning, var masterprogramma i barnevern, gender and development, helsefremjande arbeid, logopedi og pedagogikk representert.

Neste avslutningsseremoni ved fakultetet blir for bachelorkandidatane den 6. september.

Masterkandidatar ved Det psykologiske fakultet med sine vitnemål. Foto: Hanne Solheim