Bachelorprogram i kjønnsstudium

Introduksjon

Kva er kjønn? Er det noko ein er eller noko ein gjer? Kva er sambandet mellom kjønn og seksualitet? I kva grad blir vår forståing av kjønn endra i møtet med andre etniske og religiøse grupper? Kan film, litteratur og kunst skape nye og alternative former for kjønn?

Problemstillingar knytte til kjønn og seksualitet kan vere ein nøkkel til å forstå vårt globaliserte samfunn. Studiet tek for seg både historiske og samtidige tydingar av kjønn. Innanfor dei ulike emna vil det vere rom for å reflektere systematisk kring tema som kjønn og seksualitet, kjønn og etnisitet, kjønn og religion, kjønn og media, kjønn og litteratur, og kjønn og samfunn.

Sentrale omgrep i studiet er kjønnsforsking, kvinneundertrykking, patriarkat og sexisme. Du vil få eit overblikk over idear om kjønn sett frå ulike teoretiske perspektiv, slik som feministisk teori, psykoanalyse og skeiv teori (queer theory). Du vil mellom anna lese klassiske feministiske tekstar, moderne kjønnsteori, litteratur skriven av forfattarar av begge kjønn, og tekstar med vekt på kultur- og kjønnsproblematikk.

Studievegar

Bachelor

I det treårige studiet kan du spesialisere deg innanfor eitt av faga litteraturvitskap, engelsk, filosofi, historie, kulturvitskap, medievitskap, nordisk og sosiologi.

Master

Etter bachelorprogrammet kan du ta eit toårig masterprogram i det faget du har spesialisert deg i. Ved påbygging til mastergrad får du kvalifikasjonar for vidare studium og for forsking, formidling og undervising på høgare nivå.

Forsking

Spørsmål kring kjønn står sentralt i mange fagmiljø ved UiB. Mellom anna er eit stort internasjonalt, tverrfagleg forskingsprosjekt lagt til Senter for kvinne- og kjønnsforsking, som undersøker korleis kjønn, demokrati og fridom kan tenkjast i ei teknologisk, globalisert verd. Sentrale tema er dataspel, reproduksjonsteknologi, feministisk tenking, Darwins teori om seksuell seleksjon, migrasjon, innvandring, internasjonal sexhandel, terrorismelovgjeving og ulike maktomgrep.

Sjå også desse studia

Litteraturvitskap, historie, kulturvitskap, filosofi, engelsk, nordisk, medievitskap, sosiologi.

Visste du at ...

Ikkje alle kulturar opererer med to kjønn. Ulike variasjonar av eit tredje kjønn er vanleg i store deler av verda, mens bugisfolket i Indonesia deler befolkninga inn i heile fem kjønn.

Overgangsordninger

Du har høve til å byte studieprogram haust og vår. Informasjon om kva for program som er opne for intern overgang og korleis du søkjer, finn du på uib.no/utdanning.

Oppbygging

Studiet skal innehalde inntil 30 studiepoeng med innføringsemne, 60 studiepoeng med fellesemne/valemne og 90 studiepoeng med spesialisering i eit av faga engelsk, filosofi, historie, litteraturvitskap, kulturvitskap, medievitskap, nordisk eller sosiologi. I tabellen kan du sjå eit eksempel på korleis studiet kan bli lagt opp. Studierettleiaren for programmet ditt kan hjelpe deg med å setje opp ein plan. Sjå den detaljerte studieplanen for programmet på: uib.no/utdanning

Semester og emne

1. semester Examen philosophicum og Examen facultatum

2. semester Fellesemne og spesialisering

3. semester Spesialisering

4. semester Valemne

5. semester Fellesemne og spesialisering

6. semester Spesialisering

Utveksling

Som del av graden kan du studere eit eller to semester i utlandet. UiB har mange avtaler med universitet over heile verda. For studentar som tek kjønnsstudium kan det for eksempel vere interessant å reise til Nederland.

Yrkesvegar

Bachelorprogrammet i kjønnsstudium gir både allmennkunnskapar, som kan nyttast i ei rekkje yrkessamanhengar, og spesialkunnskap innan sitt felt. Programmet gjer deg godt kvalifisert for å handtere store informasjonsmengder. Du blir flink til å setje deg inn i nye problemfelt, og til å sjå og analysere saker frå fleire sider. Det gir eit godt grunnlag i alle yrke der slike eigenskapar er etterspurde, for eksempel i undervisning, forvalting og ulike former for formidlings- og informasjonsarbeid.

Søknadsprosedyre

For søkjarar med generell studiekompetanse er søknadsfristen 15. april.

For spesielle søkjargrupper og for søkjarar med realkompetanse er fristen 1. mars.

Du søkjer gjennom Samordna opptak (SO).

Du finn søknadsskjema og meir informasjon på nettet:

www.samordnaopptak.no

Søk opptak til Universitetet i Bergen og til bachelorprogrammet i litteraturvitskap.

Opptakskrav

Generell studiekompetanse eller realkompetanse.

Poenggrense ved siste opptak

Ordinær: 43,6

Førstegangsvitnemål: 37,0

Antall studieplasser

15

Meir informasjon

Ønskjer du å vite meir, ta kontakt med studierettleiar:

studierettleiar@hf.uib.no

55 58 93 70

Mål og innhald

Målet for studiet er å gi ein brei og tverrfaglig kompetanse i kvinne- og kjønnsstudiar. Studiet kan gi grunnlag for yrkesretta arbeid så vel som for vidare akademiske studiar, og gir gode føresetnader for vidare spesialisering i kvinne- og kjønnsrelaterte emne. Programmet vil gi ei innføring i kjønnsforsking, feministisk teori og feministisk vitskapsteori, og studentane vil få opplæring i kritisk og analytisk tenking omkring sentrale kjønnspolitiske og teoretiske problemstillingar. Studiet vil belyse både historiske og samtidige tydingar av kjønn. Innafor dei ulike emna vert det rom for ein systematisk refleksjon omkring tema som kjønn i ei globalisert verd, kjønn og seksualitet, kjønn og filosofi, kjønn og media, kjønn og litteratur, kjønn og samfunn.

Ettersom kvinne- og kjønnsstudiar ikkje utgjer eit eige fag på høgare nivå, vil studiet samtidig gi tilrekkeleg kompetanse til opptak på mastergradsstudium i eit av fordjupingsfaga. Studiet vil ta utgangspunkt i ulike fagtradisjonar - det være seg humanistiske , samfunnsvitskapelege eller andre - og vil samtidig ta sikte på å utvikle tverrfaglege og komparative metodar for å studere kjønn.

Krav til forkunnskaper

Generell studiekompetanse eller tilsvarande.

Undervisning

Sjå studieplan for det einskilde fag/emnet.

Innføringsemne

Exphil og akademisk skriving er obligatorisk for alle studentar på HF-fakultetet.

EXFAC00AS (Obligatorisk, helst 1. semester)

EXPHIL-HF (Obligatorisk, normalt 1.semester)

EXFAC00SP (vel eit av desse emna, normalt i 1.semester)

EXFAC00TK (vel eit av desse emna, normalt i 1.semester)

Fageining og spesialisering

Bachelorgraden i kvinne- og kjønnsstudiar inneheld 30 stp. innføringsemne (førstesemesterstudiet), 30 stp. obligatoriske programemne, 30 stp. valemne og ei spesialisering på 90 studiepoeng, der ein førebels kan velje mellom allmenn litteraturvitskap, engelsk, filosofi, historie, kulturvitskap, medievitskap, nordisk eller sosiologi.

Obligatoriske aktivitetar

Sjå studieplan for det einskilde emne.

Krav om rekkefølgje - emne

EXPHIL/ Examen philosophicum, EXFAC00TK/ Tekst og kultur eller EXFAC00SP/ Språkvitskap, EXFAC00AS/ Akademisk skriving skal takast i det fyrste semesteret (fyrstesemesterstudiet).

I andre semester er KVIK101/Introduksjon til kjønnsforsking obligatorisk.

I tredje semester er KVIK201/ Kjønnsteori obligatorisk.

Vurdering / Eksamensformer

Sjå studieplan for det einskilde fag/emne.

Yrkesvegar

Programmet kvalifiserer til arbeid i offentlig sektor (utgreiingsarbeid, likestillingsarbeid), undervisning (vidaregåande skule, universitets- og høgskulesektoren), forlagsarbeid, presse (mediearbeid, journalistikk) og elles i ulike sektorar av næringslivet, der innsikt i kvinne- og kjønnsstudiar er påkrevja.

Delstudium i utlandet

Studentane oppmodast til å ha eit utanlandsopphald i løpet av studiet. Utanlandsopphald vert anbefalt i fjerde semester. Programmet arbeidar med å inngå avtalar om utveksling med utanlandske lærestader som har særskilt kompetanse i kvinne- og kjønnsforsking. Det er òg mogelig å nytte ein av Universitetet i Bergen sine andre utvekslingsavtalar.

Ta kontakt med fagleg og/ eller administrativt ansvarlege for programmet for detaljar om utveksling.

Oppstart

Kvar haust.

Programansvarleg

Institutt for lingvistiske, litterære og estetiske studium.

Administrativt ansvarleg

Institutt for lingvistiske, litterære og estetiske studium. E-post: studierettleiar@lle.uib.no