Bachelorprogram i språk og informasjon

Programmet utgår

Studentar vert ikkje tekne opp til dette studieprogrammet.

Studiestart

Haust

Mål og innhald

Målet for studieprogrammet er å gje studentane den kompetansen som trengst for å arbeida som språk- og informasjonsarbeidarar i privat og offentleg sektor. Det skal gje kunnskapar om og dugleik i språkbruk, omsetjing, sjangerforståing, tekstforståing, tekstoppbygging og elektronisk informasjonsbehandling.

Både massemedia og nye typar medium har ført til at vi vert konfronterte med større mengder informasjon enn nokon gong før. Tekstar av alle slag, til dømes reklame og offentleg informasjon, vert produserte og spreidde i stadig større omfang. Det gjer at produksjon og formidling av viktig og lett forståeleg informasjon i dag krev solid kompetanse i morsmål og i framandspråk, i tillegg til kunnskap om formidling i ulike kontekstar og eit bevisst forhold til både grammatikk og språksystem.

Programmet er eit treårig studium som gir graden bachelor, og der førstesemesterstudiet, ex.phil. og ex.fac., høyrer med. Programmet har to variantar, alt etter om kandidaten vel eit framandspråk eller eitt av dei to faga nordisk eller lingvistikk som spesialisering.

Læringsutbyte/resultat

Studentar som følgjer studieprogrammet språk og informasjon får først solide kunnskapar om faget dei spesialiserer seg i. Dette grunnlaget blir deretter utvida gjennom programemne som digital kultur, omsetjingsteori og praktisk informasjonsarbeid. Studieprogrammet gir kompetanse som språk- og informasjonsmedarbeidar i offentleg og privat sektor, og studentane vil ha god dugleik innan (framand)språk, omsetjing, sjangrar, tekstforståing og tekstoppbygging, informasjonsarbeid og elektronisk informasjonsbehandling.

Opptakskrav

Generell studiekompetanse eller realkompetanse.

Tilrådde forkunnskapar

Ein krev ingen forkunnskapar i programemna. Sjå dei ulike spesialiseringsemna for tilrådde forkunnskapar.

Innføringsemne

Ex.phil. og ex.fac. (Akademisk skriving og Språk og kommunikasjon. Studentar som skal ta russisk spesialisering skal ta RUS100 i staden for Akademisk skriving)

Obligatoriske emne / spesialisering

Studenten skal velje anten spesialisering i eit framandspråk (engelsk, fransk, italiensk, russisk, spansk, tysk, japansk eller arabisk), eller i nordisk, lingvistikk eller datalingvistikk. Spesialiseringsfaget skal, dersom det er eit framandspråk eller nordisk, setjast saman av emne som dekkjer såvel språklege som litterære og kulturelle emne innafor det språket ein har valt. Sjå det enkelte faget for kva emne som er obligatoriske i ei spesialisering. Programemna som følgjer den einskilde spesialiseringa er obligatoriske i bachelorprogram i språk og informasjon.

Studieprogrammet kvalifiserer til opptak på masterstudium i spesialiseringsfaget. Studentar som ønskjer arabisk eller russisk som spesialiseringsfag i bachelorgraden, bør vera merksame på at opptaksgrunnlaget til masterstudium er 90 studiepoeng i faget. For å sikra seg høve til opptak på mastergradsstudium, kan ein i så fall nytta dei 15 frie studiepoenga til arabisk/russisk. Studentar som ønskjer japansk som spesialiseringsfag, må ta omsyn til at dette faget berre tar til annakvart år. Det er for tida ikkje tilbod om mastergradsstudium i japansk ved UiB, men totalt kan ein ta 120 studiepoeng i japansk. 105 av poenga kan gå inn i dette studieprogrammet dersom det valfrie emnet òg vert nytta til japansk-studium.

Tilrådde valemne

Tilrådde valemne varierer etter kva for ei spesialisering ein vel:

1) Med spesialisering i nordisk, lingvistikk eller datalingvistikk er Praktisk informasjonsarbeid (PRAKTINF) tilrådd emne i 5. semester.

2) Med spesialisering i eitt av framandspråka engelsk, fransk, italiensk spansk eller tysk er NOSP102 eller NOSP103 tilrådde emne i 4. semester.

3)Med spesialisering i eitt av framandspråka arabisk, japansk eller russisk er TRANSHF tilrådde emne i 6. semester.

Rekkefølje for emne i studiet

Emnerekkjefølgja er ulik i dei ulike variantane av programmet, alt etter kva for språkfag kandidaten vel som spesialisering. Dei første semestra har likevel felles struktur: I første semester tek alle ex.phil. og ex.fac. med Språk og kommunikasjon. I andre semester byrjar alle på spesialiseringa og tek til saman 60 studiepoeng på 100-nivå. I fjerde semester tek studenten 200-nivå i spesialiseringsfaget, i nokre spesialiseringar eitt emne på 200-nivå i kombinasjon med eit valfritt emne. Vegen vidare er ulik for dei to variantane, sjå rulleringsplanane for meir informasjon.

Krav til progresjon i studiet

For ein fulltidsstudent er normal studieprogresjon 30 studiepoeng kvart semester.

Studiestader

Bergen

Delstudium i utlandet

Ein tilrår eit utanlandsopphald i fjerde semester. Utreise bør skje gjennom ei av utvekslingsavtalene til Universitetet, og før utreise skal det liggja føre ei førehandsgodkjenning av planlagde studium for å sikra at desse kan gå inn i studieprogrammet. Studentar med framandspråkleg fordjuping bør velja ein studiestad der det aktuelle språket er morsmål. Meir informasjon: http://uib.no/utveksling

Undervisningsmetodar

Programmet omfattar ulike undervisningsformer; til dømes forelesingar, seminar, gruppeundervisning og individuell rettleiing.

Sjå emneplanen for det einskilte emnet.

Vurderingsformer

Gjennom programmet blir studentane prøvd på ulike måtar, eksempelvis ved mappevurdering, skoleeksamen, semesteroppgåve og munnleg prøve.

Sjå emneplanen for det einskilte emnet.

Kompetanse for vidare studium

Bachelorprogrammet gir høve til å gå vidare med master i spesialiseringsfaget.

Yrkesvegar

Bachelorprogrammet språk og informasjon er sett saman med tanke på å gje relevant kompetanse for å arbeida med språk- og informasjonsoppgåver i privat og offentleg verksemd. Du kan dessutan gå vidare til mastergrad og slik kvalifisera deg for vidare studium og for forsking, formidling og undervisning på høgare nivå.

Evaluering

Programmet vert evaluert i tråd med UiB sitt kvalitetssikringssystem.

Fagansvarleg

Institutt for fremmedspråk

Administrativ ansvarleg

Studierettleiar ved Institutt for framandspråk. E-post: studierettleiar@if.uib.no

Læringsutbyte/resultat

Studentar som følgjer studieprogrammet språk og informasjon får først solide kunnskapar om faget dei spesialiserer seg i. Dette grunnlaget blir deretter utvida gjennom programemne som digital kultur, omsetjingsteori og praktisk informasjonsarbeid. Studieprogrammet gir kompetanse som språk- og informasjonsmedarbeidar i offentleg og privat sektor, og studentane vil ha god dugleik innan (framand)språk, omsetjing, sjangrar, tekstforståing og tekstoppbygging, informasjonsarbeid og elektronisk informasjonsbehandling.