Forsking ved Det samfunnsvitskaplege fakultetet
Forskarar ved Det samfunnsvitskaplege fakultet publiserer forsking innan ei rekkje fagfelt, og bidreg med ny kunnskap innan viktige samfunnsspørsmål. Forskarane søkjer kontakt med samfunns- og næringsliv, og formidling av forskingsresultat er ein naturleg del av forskingsinnsatsen. Fakultetets forskingsverksemd skal vera økonomisk og politisk uavhengig.
Organisering
Forsking og forskarutdanning ved fakultetet er organisert i disiplinære og tverrfaglege institutt og forskargrupper. Solid forskingsverksemd over tid har ført til at det er stor tematisk bredde innan kvar einskild fagdisiplin. For strategiperioden 2011-2015 er det også valt ut fem tematiske forskingsfelt som går på tvers av institutt og fag.
I tillegg til utstrekt samarbeid med andre fakultet ved UiB og forskingssenter i Bergen, har forskarane omfattande samarbeidsrelasjonar nasjonalt og internasjonalt. Samarbeid mellom institutt og andre fagmiljø ved Universitetet i Bergen er ofte organisert gjennom avdelingar i forskingsselskapet Uni Research.
Satsingsområde ved UiB
Universitetet i Bergen har i mange år hatt utviklingsforsking og marin forsking som overordna tverrfakultære strategiske forskingssatsingar. Fagmiljøa ved Det samfunnsvitskaplege fakultetet har gitt viktige bidrag til den samla utviklingsforskinga ved UiB og den posisjonen UiB har som eit internasjonalt universitet med sterk vekt på samarbeid med land i Sør.
-
Utviklingsrelatert forsking
Utviklingsrelatert forsking er eit bredt og samansett forskingsfelt. Fakultetet har lange tradisjonar innan dette feltet, og forsking ved dei ulike institutta omfattar m.a. tema som globalisering, fattigdom, demokratiutvikling, miljøendringar og ressursforvalting.
-
Informasjon, kommunikasjon og kultur
Kommunikasjonsmåtar og -prosessar spelar ei viktig rolle i politiske, økonomiske, sosiale og kulturelle prosessar i samfunnet. Målsettinga for dette forskingsfeltet er å utvikle nyskapande fagmiljø ved å kombinere perspektiv og innsikter frå dei human-, samfunns- og teknologifaglege tradisjonane.
-
Demokrati og rettsstat
Demokrati og rettsstat er grunnleggjande tema i samfunnsvitskapen. Samfunnsendringar og tiltakande rettsleggjering reiser viktige spørsmål om vilkåra for politisk deltaking, maktfordeling og prosessar rundt politiske avgjerder.
-
Velferd, arbeidsliv og migrasjon
Den moderne velferdsstaten vil i åra framover møte ei rekkje utfordringar. Viktige tema innan dette forskingsfeltet er m.a. velferdsmodellar, forvaltningsreformer, helsetenester, arbeidsliv, migrasjon og familiepolitikk.
-
Klimaendringar og samfunnsmessige konsekvensar og tiltak
Miljø-, ressurs- og klimaspørsmål er sentrale for framtidas samfunn, lokalt så vel som globalt. Dette temaet er eit prioritert forskingsfelt for fakultetet dei komande åra.