- Tenk internasjonalt

Leiar for SAU, Sean Lobo, meiner Internasjonal dag dekkjer eit viktig informasjonsbehov blant studentar. Foto: Karoline Vårdal

Studentane Sunniva Haugen (20) og Maria Andvik (20) har enno ikkje bestemt seg for om eit utanlandsopphald i samband med studiet er noko for dei. Foto: Karoline Vårdal

Frank Aarebrot snakka til ein fullsett sal om den kontroversielle Nobelprisen til Barack Obama. Foto: Karoline Vårdal

Torsdag vart for første gang Internasjonal dag arrangert i regi av Samfunnsviternes Arbeidsutvalg (SAU) ved Det samfunnsvitskapelige fakultet (SV). Informasjonsdagen siktar på å gje studentar inspirasjon til å engasjere seg i internasjonale problemstillingar, og kanskje ta delar av studiet i utlandet.

- Vi skal bruke dagen til å opplyse studentar om opphald i utlandet, samt studie- og jobbtilbod. Vi vil avmytifisere at det er vanskeleg å reise over landegrensene. Å bu utanlands krev berre god informasjon og planlegging, meiner Lobo.

For interesserte

Studiekonsulentar frå dei ulike studieprogramma ved SV stod på stand for å informere studentane om tilbod og avtalar i utlandet. Fleire bedrifter og organisasjonar var til stades og heldt foredrag om si verksemd. Blant desse var  representantar frå Utenriksdepartementet og Senter for Internasjonalisering av høyere utdannelse  (SIU) til stades.

Studentane Sunniva Haugen og Maria Andvik brukar dagen sin til å bli informert om det internasjonale tema. Begge går sitt første år på bachelorprogrammet i samanliknande politikk. – Vi har enno ikkje bestemt oss for om vi vil studere i utlandet. Men dette er eit godt informasjonstilbod for interesserte, meinar dei.

Ei betre verd?

Av foredragshaldarar var blant anna professor Frank Aarebrot invitert. Hans foredrag dreia seg rundt spørsmålet om Barack Obama har endra verda, og den kontroversielle Nobelpris-tildelinga.

Ein av konklusjonane til Aarebrot er at verda kanskje har blitt betre, rett og slett fordi Bush ikkje lenger sit med makta.  Påstanden blir godt teken i mot av studentane i den fullsette salen.