Fullt hus på byttefest

Med kvite lappar påskriven ein verdi for tinga ein tok med, kunne gjestane bytte til seg sko, musikk, bøker, smykke og kle.

Sekretær for lokallaget til FIVH i Bergen, Stian Hacket, er nøgd med oppmøtet for kvelden.

Studentane Kim Anh Le (23) og Elise Vegard (21) har bytt til seg eit skjerf, armeband og ein film.

- I forhold til tusenårsmåla til FN-sambandet, ein av samarbeidspartnararane til Internasjonal veke og Internasjonale studentdagar, er bytefesten eit tiltak som skal setje fokus på berekraftig utvikling. Det fortel leiar for lokallaget til FIVH Bergen, Yngvild Brandser.

- Vi ønskjer å gjere folk medvitne på det overforbruket som pregar den vestlege verda i dag og snu denne trenden ved å skape nye vanar, for eksempel ved at folk byter til seg fullt brukbare ting på arrangement som dette, seier Brandser. Mange har teke turen til festen og alle bord er dekka av kle og ting.

- Om det blir kle til overs etter bytefesten går dei til Fretex, så ingenting blir kasta, forsikrar Brandser.

Større pågang

Lokallagleiaren hevdar at det alltid er godt oppmøte når dei arrangerar bytefestar. Denne gongen meiner ho det er veldig godt oppmøte på grunn av samarbeidet og fokuset festen får gjennom å vere ein del av samarbeidsprosjektet, Internasjonal veke. .

Internasjonal veke er eit samarbeidsprosjekt mellom fleire store regionale og internasjonale aktørar. Partnarane FN-sambandet, Norad og Internasjonal Veke i Bergen har laga eit breitt program, der studentsamarbeidet inngår.
- Dette har løfta arrangementet fram i lyset. Samtidig som vi held festen i eit større lokale, gjev det større kapasitet, seier ho

Byteverdi

Studentane har bytt frå seg, og nokre står og beundrar sine nyvunne ting.
- Eg skulle berre prøve på dette skjerfet, og så blei det mitt, seier Kim Anh Le og smiler. Ho har med seg venninna Elise Vegard, som ikkje visste at det var byttefest i kveld. Saman har dei bytta til seg litt småting og eit smykke som Kim viser fram.

- Det var vanskeleg å finne kle, hevdar dei to. Det er mykje folk rundt borda og stor pågang, noko dei meiner er årsaka. Kim har ikkje vore på bytefest før, og synest det er eit flott alternativ til å kjøpe alt nytt.
- Tinga som eg tok med for å bytte, hadde eg planar om å gje til Fretex uansett. På denne måten blir eg meir medviten på kvar verdiar eg har, meiner Le.

Internasjonale studentdagar

Det er Utdanning i Bergen som står bak og fleire samarbeidspartnarar som står bak programmet til Internasjonale studentdagar. Med filmvisning, byttekveld, matkonkurranse og andre aktivitetar er ein av satsingane til samarbeidsprosjektet å få internasjonale spørsmål fram i lyset.

Samtidig ønskjer dei at arrangementet skal skape ein møtestad for nasjonale og internasjonale studentar. Derfor blir all informasjon blir ført på engelsk og arrangement er gratis. Her skal verken språk eller økonomi vere eit hinder for å delta.