På karrierejakt

Leiar for Springbrettet Marit Asheim og leiar for Karrieredagen John Aas håper Karrieredagen motiverar studentane til å kjempe om jobbane.

Av Karoline Vårdal

- Grunnen til at vi har vald dette temaet for Karrieredagen er at vi ynskjer å provosere studentane, men også forberede dei på det som kjem. Det seier John Aas som er leiar for Karrieredagen.

Kamp-temaet set fokus på trenden som herjar næringslivet: Finanskrisa. 
- Sidan det er færre jobbar som vert utlyst må dei nyutdanna yte ekstra ovanfor bedriftene og kjempe om jobbane, seier leiar for Springbrettet, Marit Asheim. Det er i denne kampen Karrieredagen skal hjelpe studentane på veg.

Samarbeid mellom Springbrettet og Karrieresenteret

Karrieredagen 2009 er eit samarbeid mellom Springbrettet og Karrieresenteret som vert arrangert for tredje året på rad i Grieghallen.

Programmet for dagen består blant anna av at studentane kan få sin CV og søknad gjennomgått av representantar ved Karrieresenteret. Studentane kan også få innsikt i bedriftene ved å besøkje dei på stand eller på speed-presentasjon. Her får bedriftene tre minutt til å vise kvifor studentane skal velje akkurat dei som sin framtidige arbeidsgjevar.

Skal motivere studentane

- I år har vi ikkje hatt så mange foredrag på programmet, fordi vi har fått tilbakemelding frå studentane om at dei ynskjer å nytte meir av tida til å mingle med bedriftene, seier Asheim. Men ein av dei som har fått plass på programmet er motivator Øyvind Hammer. Hammer er mest kjend for å ha jobba med blant anna Ole Einar Bjørndalen og Henning Solberg.
Asheim håpar at foredraget kan motivere dei nyutdanna studentane til å ta opp kampen og møte utfordringane som dei står ovanfor i jakta på jobb.

75 bedrifter på stand

Arbeidsmarknaden for nyutdanna studentar har blitt tøffare. Under årets arrangement stod 75 regionale og nasjonale bedrifter på stand for å møte bergensstudentane. I fjor talde dei 88.
- Vi trur årsaka til at færre bedrifter er her i dag, skuldast konjunktursvingingane som gjer at vi har ein dårlegare arbeidsmarknad no, seier Asheim.

Sjølv om det har vorte færre bedrifter på stand, meiner Aasheim at utvalet av bedrifter som deltek i år er meir tverrfaglege.
- Det er eit breiare spekter av arbeidsgjevarar som presenterar seg, og vi håpar at tilbodet i år kan treffe fleire av studentane, seier ho.