Generell studiekompetanse

Vidaregåande opplæring

Generell studiekompetanse inneber at du:

• har eit vitnemål om fullført og greidd treårig vidaregåande utdanning

ELLER

• har fagbrev eller sveinebrev

OG

• har fullført og greidd faga norsk (393 årstimar), engelsk (140 årstimar), historie (140 årstimar), samfunnsfag (84 årstimar), matematikk (224 årstimar), naturfag (140 årstimar) .

Meir informasjon om generell studiekompetanse kan du finne på Samordna opptak sine nettsider.

23/5-regelen

Ein annan veg til generell studiekompetanse er å søkja på grunnlag av ein kombinasjon av utdanning og praksis. Du kan søkje etter 23/5-regelen om du

• fyller 23 år i opptaksåret og kan dokumentere minst fem års praksis

OG

• har fullført og greidd faga norsk (393 årstimar), engelsk (140 årstimar), historie (140 årstimar), samfunnsfag (84 årstimar), matematikk (224 årstimar), naturfag (140 årstimar) .

Kva slags fag frå Reform 94 eller tidlegare som tilsvara desse finn du ei oversikt over på denne nettsida.
Meir informasjon om 23/5-regelen kan du finne på Samordna opptak sine nettsider.

Høgare utdanning

Høgare utdanning kan kvalifisere som generell studiekompetanse viss søkjaren ikkje kan dokumentere generell studiekompetanse på bakgrunn av fullført og greidd vidaregåande opplæring eller etter 23/5-regelen. Du kan finne meir informasjon på nettsidene til Samordna opptak. 

Utdanning frå utlandet

Søkjarar med utdanning frå utlandet kan bli kvalifiserte for opptak til høgare utdanning i Noreg viss ein kan dokumentere at utdanninga frå utlandet er på nivå med norsk vidaregåande opplæring som gir generell studiekompetanse. Søkjarane må i tillegg dokumentere kunnskapar i norsk og i nokre fall engelsk.

Utdanning frå land i Norden

Søkjarar med treårig videregåande utdanning frå andre nordiske land får generell studiekompetanse utan tilleggskrav i norsk når opplæringa gir generelt grunnlag for opptak til universitet og høgskule i dei respektive landa.

Språkkrav for søkjarar med utdanning frå land utanfor Norden

Norsk

Norskkravet blir godkjent når ein av følgjande prøver er greidde:

1. Norsk med 393 timar frå norsk vidaregåande opplæring.
2. Eksamen frå trinn 3 i norsk for utanlandske studentar ved universiteta.
3. Eksamen frå eittårig høgskulestudium i norsk språk og samfunnskunnskap for utanlandske studentar.
4. Test i norsk, høgare nivå, ("Bergenstesten") med minimum 450 poeng. 

Du finn grundigare informasjon om språkkrava på Samordna opptak sine nettsider. Ver merksam på at Universitetet i Bergen ikkje tilbyr norskkurs til søkjarar som ønsker å kvalifisera seg for opptak til laveregrads studium.