Programmet er klart

Christiekonferansen er den viktigaste arenaen for samhandling mellom akademia og omverda. – Konferansen skal synleggjera det breiddeuniversitetet UiB er, men ikkje minst skal det vera ein arena for kontakt, seier Anne Lise Fimreite til uib.no.

Ho leiar programkomitéen som i desse dagar har ferdigstilt programmet til konferansen, som mellom andre har nærings- og handelsminister Trond Giske som deltakarar.

Moglegheiter og utfordringar

Perspektivet for årets konferanse er Universitetet i Bergen – eit internasjonalt anerkjent forskingsuniversitet utanfor hovudstaden. Ein ynskjer å sjå kva moglegheiter og utfordringar det å ikkje vera plassert i hovudstaden kan gje Bergen, Vestlandet og Noreg.

I haust vart UiB rangert som nummer 135 på Times Higher Education si liste over verdas fremste universitet og dermed som det beste i Noreg.

- Dei beste universiteta er ikkje hovudstadsuniversitet, til dømes Harvard, Cambridge, Lund og Uppsala. Me spør om det kan liggja ein styrke i å vera utanfor hovudstaden. UiB er til dømes ikkje geografisk nær departementa og maktsfæra i Oslo, kva tyder det for oss – på godt og på vondt, spør Fimreite.

Phil Baty, redaktør i Times Higher Education, kjem til konferansen for å utdjupa kva typar universitet det er som skil seg ut i verdstoppen. I tillegg kjem rektor Per Eriksson frå Universitetet i Lund, som har ei historie som strekk seg tilbake til 1438.

600 års erfaring

- Universitetet i Lund har ein profil som liknar vår, dei ligg utafor hovudstaden og er sterkt markerte internasjonalt. Rektor kan snakka utfrå 600 års erfaring.

Nærings- og handelsminister Trond Giske kjem til å halda innleggh om temaet.

- Det er viktig å vita korleis makthavarane ser på UiB si rolle spesielt og universiteta si rolle meir spesielt, seier Fimreite.

Invitasjonane er sendt ut, og påmeldingsskjemaet ligg klart. UiB sine samarbeidspartnarar er inviterte: næringslivet frå a til å, politikarar, representantar frå offentlig sektor, kulturlivet og andre store organisasjonar og utdanningsinstitusjonar. Tilsette og studentar ved UiB er også meir enn velkomne på konferansen.

- Dette er ein arena der ein skal møtast og me har sett av god tid til pausar og lunsj. For studentar som snart skal ut i arbeidslivet er konferansen eit godt høve til å møta framtidige arbeidgjevarar og høyra kva behov og forventningar dei har.