Bærekraftskonferansen blir eit årleg arrangement
Rektor Dag Rune Olsen lova å gjere UiB klimanøytralt innan 2030.
Main content
8. og 9. februar var Universitetsaulaen åstad for Bærekraftskonferansen i Bergen. UiB har teke initiativet til å samla universitets- og høgskulesektoren i Noreg, i tillegg til politikarar, embetsmenn, frivillige organisasjonar og næringsliv for å diskutere si rolle i implementeringa av FN sine berekraftsmål – Sustainable Development Goals.
– Konferansen er eit arrangement som vi no lover å gjere til ei årleg hending. Ein arena for diskusjonar om bærekraftsmåla, og for å fremje krysninga der politikk møter vitskap, seier rektor Dag Rune Olsen.
I sin avslutningstale la viserektor for globale relasjonar Annelin Eriksen fram grunngjevinga til UiB. Ambisjonen er å halde diskusjonen igang, og for å få institusjonar for høgare utdanning og forsking til å i endå større grad sjå på dei ulike måtane dei kan påverke dette på. Dette er eit fokus universitetet vil halde gåande.
Blant gjestane var også tre statsrådar, statsminister Erna Solberg, minister for forsking og høgare utdanning Iselin Nybø og utviklingsminister Nikolai Astrup.
– Vi når ikkje bærekraftsmåla utan betydelege bidrag frå høgare utdannings- og forskingsinstitusjonar. Her i Bergen følgjer handling ord, sa Iselin Nybø i sin opningstale.
– Vi kan ikkje koma vidare utan å sjå på korleis vi kan gjera ting på ein ny måte. Til dette treng me universiteta og akademia, sa Erna Solberg på konferansens andre dag.
