Formidling av staden med bruk av NRKs radioarkiv

Teknologiutviklinga fører til gjennomgripande samfunnsendringar og påverkar vår fortolking av omgjevnadane. Stadar og minner blir vanskelege å forstå og historiske spor blir utydelege for oss.

Avhandlinga tek utgangspunkt i påstandar om at teknologien svekker stadforståinga vår. Den undersøker korleis tverrfagleg samskapingsdesign fungerer for å utvikle teknologibaserte løysingsforslag på utfordringar i natur- og kulturarvsforvaltinga som kan styrke vår forståing av staden.

Prosjektet tek i bruk ein eksisterande ressurs, NRKs radioarkiv, til stadbasert digital formidling på Dovrefjell og utforskar korleis historiske lydklipp kan bidra til å avdekke forteljingane som er skjulte i landskapet. I samskaping med ulike aktørar er det utvikla to versjonar av appen Fortidsfinnar. Den eine brukar AAR (Audio Augmented Reality) for formidling på staden, medan den andre er VR-basert.

Med bruk av innovasjonspedagogikk som didaktisk metode, har studentar tatt aktivt del i designprosessen med mål om å førebu dei på ei framtid i ein mediebransje prega av raske omstillingar og behov for innovasjonskompetanse.

Avhandlinga synleggjer samanhengen mellom denne metoden og samskapingsdesign som forskingstilnærming. Den gjev innsikt i korleis teknologi kan bidra til djupare stadforståing, men også verke forstyrrande. Og bidreg med ny kunnskap om korleis praktisk og samskapande medieforsking kan bli ein ressurs for natur- og kulturarvssektoren.

Personalia

Rebecca Nedregotten Strand (f. 1980) har mastergrad i kulturminneforvalting frå NTNU Trondheim og er lektor ved Avdeling for mediefag på Høgskulen i Volda. Ho har vore journalist og programskapar i NRK og skrive to fagprosabøker. Avhandlinga er gjennomført ved institutt for informasjons- og medievitenskap ved Universitetet i Bergen.