Fastlegar som rettleiarar for medisinstudentar i praksis

Behovet for fleire rettleiarar i allmennmedisin aukar i takt med aukande tal av medisinstudentar på norske universitet. Det er ei utfordrande oppgåve å skaffe nok rettleiarar til klinisk utplassering i medisinstudiet fordi fastlegane jobbar i eit system med tidspress og aukande mengd oppgåver.

I avhandlinga har Knutsen kartlagt kapasiteten hos norske fastlegar når det gjeld rettleiing av medisinstudentar i slutten av medisinstudiet, samt deira haldningar og avgrensande faktorar når det gjeld å ta imot studentar. Parpraksis – kor to studentar er i praksis samstundes på same legekontor – har blitt utforska som eit ledd i vurdering av kapasiteten for framtida og kvaliteten på praksisopplevingane.

Ei spørjeundersøking viste at det er vilje blant mange norske fastlegar å halde fram som eller å bli rettleiarar for medisinstudentar. Viktige faktorar for dette var nok kontorplass, tilstrekkeleg løn og auka rettleiingskompetanse. Haldningane til rettleiing var positive, og fastlegane var motiverte av rekrutteringseffekten som praksis kan ha for allmennmedisinfaget, samt deira eigen faglege utvikling. I ein intervjustudie viste erfaringar frå parpraksis at det var mange måtar å gjennomføre parpraksis på. Støtta studentane ga kvarandre gjennom praksis førte til rike og gode opplevingar, og auka tilgangen til læringsaktivitetar. Studentane lærte av kvarandre, og saman med rettleiarane uttrykte dei at parpraksis var eigna i praksisar med minst eitt studentkontor og tilstrekkeleg tilgang på pasientar.  

Resultata peikar på at det er potensial for å auke rettleiingskapasiteten i allmennmedisin. Økonomiske insentiv, tilrettelegging av kontorfasilitetar og kompetanseheving er naudsynte faktorar, og tilbod om parpraksis kan vere eit godt supplement til den tradisjonelle praksismodellen.  

Personalia

Julie Solberg Knutsen (f.1994) er utdanna lege ved Universitetet i Bergen (2019). Ho har jobba med praksis for medisinstudentar og praksisrettleiing, og har vore engasjert i undervising både på Eining for læring og Fagområde for allmennmedisin. Avhandlinga utgår frå Institutt for global helse og samfunnsmedisin ved Det medisinske fakultet, Universitetet i Bergen. Hovudrettleiar er professor emeritus Steinar Hunskår og medrettleiar professor Gunnar Tschudi Bondevik.