Thomas Völker

Thomas Völker er forskar ved Senter for vitskapsteori ved Universitetet i Bergen. Han er postdoktor i det Marie Skłodowska-Curie-finansierte programmet SEAS (Shaping European Research Leaders for Marine Sustainability), der han skal forske på ansvarleg og sirkulær akvakultur. Völker si forsking tek utgangspunkt i det tverrfaglege feltet STS (teknologi- og vitskapsstudiar), som utforskar samfunnsrolla til vitskap og teknologi. SEAS-gruppa består av postdoktorar fra sju fakultet ved UiB som jobbar tverrfagleg saman med eit fokus på marin berekraft.

Frå 2020-2022 var Völker ein av Universitetet i Bergen sine representantar i sekretariatet til UNESCO Global Independent Expert Group on Universities and the 2030 Agenda (EGU2030).

Han har bakgrunn i sosiologi, og i doktorgradsavhandlinga si studerte han såkalla "futuring" practices i transdisiplinær berekraftsforsking frå eit STS-perspektiv (vitenskaps- og teknologistudiar). Etter at han fullførte doktorgraden sin ved Universität Wien, byrja han å jobbe for Europakommisjonen sitt Joint Research Centre (JRC), der han vidareutvikla forskingsinteressene sine i retning av eit fokus på deltakande avgjerdstaking i dei mange skjeringspunkta mellom vitskap, politikkutforming og samfunn. Völker har jobba både innanfor akademia og med politikkutforming, der han har forska på kunnskapsproduksjon- og sirkulasjon i styringsprosessar relatert til miljø, samt kollektiv eksperimentering med deltakande demokrati i utforming av politikk.