Hornnesvika, Førde kommune

I april 2005 vart det gjennomført ei arkeologisk utgraving i Hornnesvika, Hornnes, Førde kommune, Sogn og Fjordane. Hornnesvika ligg på nordsida av Førdefjorden rundt 2-3 km nordvest for Førde sentrum mot Florø og Naustdal.

Det er tidlegare kjent fleire lausfunn frå garden Hornnes. Ei skaftgryte av kleberstein frå vikingtid/tidlig middelalder, to spissnakka økser av Stakanes-diabas frå eldre steinalder og fleire klebersøkke. På terrasseflaten nordvest for Hornnesvika var det i 1996 ei utgraving i regi av Bergen Museum. Her vart det påvist busetnadsspor frå steinalder og fram til yngre jernalder. Spor etter minst 15 hus og bygningsliknande anlegg med ei datering som strekte seg frå eldre bronsealder til merovingartid vart avdekka (Diinhoff 1997).

Frå gravinga i april vart det med maskinell flateavdekking i Hornnesvika påvist over 100 anlegg av forhistorisk karakter, bl.a. to hus, ei mulig grav, eldstader og kokegroper samt forhistorisk dyrking og ardspor. Ingen av anlegga frå utgravinga er førebels daterte. Men dateringane frå registreringa er frå førromersk jernalder og tidleg romartid. Det er ingen gjenstandsfunn frå utgravinga.