Universität zu Köln og Det juridiske fakultet (ERASMUS+ - 3. og 5. studieår)

Om avtalen

Kven kan søke

Denne avtalen kan nyttast av studentar både på 3. studieår og siste studieår av masterstudiet i rettsvitskap.

Når i studiet kan eg reise

Studentar som starta på det femårige masterprogrammet hausten 2021 eller seinare kan reise på utveksling i vårsemesteret på tredje studieår. Under utanlandsopphaldet tek du valfrie juridiske emne i staden for emna du ville studert om du var i Bergen.

I tillegg kan alle jusstudentar, både dei på femårig og dei på toårig masterprogram, reise på utveksling i sitt siste studieår. Under dette utanlandsopphaldet fullfører du spesialemna dine, og i nokre tilfelle også masteroppgåva.

Under overskrifta "kven kan søke" finn du ut om utvekslingsavtalen gjeld for studentar på tredje eller på femte studieår, eller begge.

Språk

Undervisningsspråket er i hovudsak tysk, men på bachelornivå har dei og eit utval juridiske emne om amerikansk rett som blir undervist på engelsk.

Hvis du skal utveksle på 3. studieår er det nok emne på engelsk til å fylle semesteret kun med emne på engelsk.

Hvis du skal utveksle på 5. studieår blir emna du kan ta underviste på tysk.

Universitetet har tilbod om tyskkurs. Frå nettsidene til internasjonalt kontor kan du gå til ei eiga nettside med opplysningar om språkkurs.

Lånekassen har eit eige stipend ein kan søke for å få dekt utgifter til førebuande språkkurs i utlandet.

Kva emne kan eg ta

Ved dette universitetet kan du ta juridiske emne som blir godkjente som valemne på 3. studieår eller som spesialemne og fordjupingsemne på siste studieår.

Utveksling på 3. studieår:
Opplysningar om studietilbodet ved Rechtswissenschaftliche Fakultät finn du på denne nettsida.

Det er ein føresetnad at emna du vel ikkje har same innhald som emne du har teke tidlegare, eller planlegg å ta seinare, ved UiB eller på utveksling.

Universitetet nyttar ECTS-systemet. Ein ECTS er det samme som eitt studiepoeng.

Utveksling på 5. studieår:

Utvekslar du på siste studieår skal du velje emne frå dei tre masterprogramma "Master's in Business Law", "Master's in Digitalisation" og "Master's degree program in German Law for graduates from abroad".

Alle dei tre programma blir underviste på tysk, og du må ha gode tyskkunnskapar.

Det er ein føresetnad at emna du vel ikkje har same innhald som emne du har teke tidlegare, eller planlegg å ta seinare, ved UiB eller på utveksling.

Universitetet nyttar ECTS-systemet. Ein ECTS er det samme som eitt studiepoeng.

Vil du ta LLM-grad ved Universität zu Köln etter at du har fullført studiet ved UiB?

Dei aktuelle masteremna du har teke under utvekslinga vil kunne inngå i ein mastergrad frå Köln dersom du sidan ønskjer å søke opptak til eit av masterprogramma ved Universität zu Köln. Dermed kan du fullføre LLM-graden i Köln på kortare tid enn normalt. Du søker i så fall opptak til eit LLM-program ved Universität zu Köln på eiga hand og direkte til Universität zu Köln, ikkje via UiB.

Studieavgift

Erasmus-studentar betaler ikkje studieavgift ved vertsuniversitetet, men skal registrere seg og betale semesteravgift ved UiB for heile den tida dei er ute.

Om lærestaden

Om lærestaden og byen

Universität zu Köln blei grunnlagt i 1388, og er eit av dei største og eldste universiteta i Tyskland. Dei 46 000 studentane kan velje i eit fagtilbod med alle dei klassiske universitetsdisiplinane. Dei fleste universitetsbygningane ligg i bydelen Lindenthal, vest for sentrumskjernen.

Köln er den fjerde største byen i Tyskland, med litt over ein million innbyggarar. Han ligg Nordrhein-Westfalen, men blir òg omtalt som «den nordlegaste byen i Italia» på grunn av det gjestmilde sosiale klimaet. Köln er kjend for Kölnerdomen, verdas største gotiske katedral, for karnevalet som blir halde i februar kvart år, for ølet Kölsch og for parfymen Eau de Cologne.

Bustad

Universitetet har eit internasjonalt kontor ved kvart fakultet som hjelper utvekslingsstudentar med å finne bustad. Det finst fleire studentbustader her, som blir drifta av den lokale studentsamskipnaden. Det kan elles vere vanskeleg å finne bustad på den private marknaden i Köln.

Semesterinndeling

Oktober - mars og april - juli/august.