Universität Greifswald og Det juridiske fakultet (ERASMUS+ - 3. (og 5.) studieår)

Om avtalen

Kven kan søke

Denne avtalen kan nyttast av studentar på 3. studieår av masterstudiet i rettsvitskap.

Studieåra 2023/2024 og 2024/2025 kan avtalen også nyttast av studentar på siste studieår av masterstudiet i rettsvitskap (studentar på studieordninga av 2003).

Når i studiet kan eg reise

Studentar som starta på det femårige masterprogrammet hausten 2021 eller seinare kan reise på utveksling i vårsemesteret på tredje studieår. Under utanlandsopphaldet tek du valfrie juridiske emne i staden for emna du ville studert om du var i Bergen.

I tillegg kan alle jusstudentar, både dei på femårig og dei på toårig masterprogram, reise på utveksling i sitt siste studieår. Under dette utanlandsopphaldet fullfører du spesialemna dine, og i nokre tilfelle også masteroppgåva.

Under overskrifta "kven kan søke" finn du ut om utvekslingsavtalen gjeld for studentar på tredje eller på femte studieår, eller begge.

Språk

Undervisningsspråket er tysk.

Universitetet har tilbod om gratis tyskkurs for utvekslingsstudentar. Du finn opplysningar om gratis tyskkurs på nettsida for innreisande studentar.

Lånekassen har eit eige stipend ein kan søke for å få dekt utgifter til førebuande språkkurs i utlandet.

Kva emne kan eg ta

Ved dette universitetet kan du ta juridiske emne som blir godskrivne som valemne på 3. studieår (2021-studieordninga) eller spesialemne på siste studieår i masterprogrammet i rettsvitskap (2003-studieordninga).

Opplysningar om rettsvitskaplege emne finn du på denne nettsida.

Universitetet nyttar ikkje ECTS-systemet der ein ECTS-credit er det same som eitt studiepoeng. Derfor må du rekne om frå lokale studiepoeng til ECTS-credits etter instruks frå vertsuniversitetet.

Det er ein føresetnad at emna du vel ikkje overlappar innhaldsmessig med emne du har tatt tidlegare, eller planlegg å ta seinare ved UiB.

Studieavgift

Erasmus-studentar betaler ikkje studieavgift ved vertsuniversitetet, men skal registrere seg og betale semesteravgift ved UiB for heile den tida dei er ute.

Om lærestaden

Om lærestaden og byen

Ernst-Moritz-Arndt-Universität Greifswald, som vanlegvis blir kalla EMAU Greifswald, blei grunnlagt i 1456 og er eit av dei eldste universiteta i Nord-Europa. Det har om lag 13 000 studentar og fem fakultet. Universitetet satsar på tverrfagleg forsking, og samarbeider mykje med andre forskingsinstitusjonar i regionen.

Greifswald er ein kystby med rundt 60 000 innbyggarar, som ligg nordaust i den tyske delstaten Mecklenburg-Vorpommern. I perioden 1648-1815 var byen svensk, og her finst stadig eit sterkt samband med Skandinavia og skandinavisk kultur.

Bustad

Studentbustadane i Greifswald er drifta av den lokale studentsamskipnaden. Internasjonale studentar søker på linje med tyske studentar. Det er òg mogleg å finne rimeleg prisa bustad på den private marknaden i Greifswald.

Semesterinndeling

Oktober - mars og april - august.