Akutte brannskadar og følgjetilstandar av slike skadar er mellom dei største helseutfordringane i verda, i følgje WHO. Meir enn 200 000 menneske i verda døyr av brannskadar årleg. I Noreg er Nasjonal behandlingsteneste for avansert brannskadebehandling samla i Bergen. Brannskadeavdelinga (BSA) ved Haukeland universitetssjukehus har hatt landsfunksjon som nasjonalt brannskadesenter sidan avdelinga opna i 1984. Årleg får meir enn 150 pasientar med akutte brannskadar behandling ved BSA. Avdelinga har ansvar for både akutt behandling og rekonstruksjonar av følgetilstandar, og driftar Norsk Brannskaderegister.
Forskingsgruppa for brannskadebehandling og rekonstruktiv kirurgi er eit samarbeid mellom forskarar ved Universitetet i Bergen og Brannskadeavdelinga ved Haukeland universitetssjukehus.
Forskingsgruppa har som mål å utvikle betre behandling for pasientar med brannskader og bidra til betre rekonstruksjonstilbod til pasientar med behov for plastikkirurgiske rekonstruksjonar.
Forskargruppa har etablert akademisk samarbeid med forskarar frå University of Texas Medical Branch og frå dei nordiske brannskadesentra i Helsinki og Linköping.
Gruppa vert leia av førsteamanuensis Stian Kreken Almeland og har medlemmer frå fleire av faggruppene som er knytt til Brannskadeavdelinga ved Haukeland universitetssjukehus.