Vegetasjonshistorie og jordbruksutvikling på Vestlandet

I avhandlinga tek Mehl føre seg vegetasjonsutviklinga på vestlandet etter istida, med spesiell vekt på utviklinga etter at jordbruket vart etablert, for om lag 4200 år sidan. Undersøkinga er basert på pollenanalyse av sediment i Kalandsvatnet i Fana og Herandsvatnet i Jondal kommune. I Herand er òg meir detaljerte undersøkingar gjort av ei jordsjakt i innmark. I tillegg er data frå Sotra og Fitjar nytta for å sjå utviklinga i ulike regionar av vestlandet.

Etter at jordbruket vart etablert førte dette til større påverknad på vegetasjonen. Skogen vart gradvis opna opp av menneske ved hogst og brann. Men det var skilnader innan regionen. Heilt i vest på Sotra fanst lyngheiene som vart ei viktig driftsform i kystlandskapet, med lyngsviing og beiting gjennom heile året. På Fitjar, i området mellom ytre kyst og indre fjordstrøk var det også lyngheidrift. Men rikt jordsmonn gjorde at det i tillegg kunne drivast meir tradisjonelt jordbruk med slåttenger, beite og korndyrking. I Herand ved Hardangerfjorden var ikkje vintrane milde nok for noko lyngheidrift, men morenejord la til rette for slåttenger, beite, korn- og lin-dyrking.

I avhandlinga er nye metodar, der ein reknar om pollenprosent-verdiar til areal dekke av vegetasjonen tekne i bruk. Dette gjev nye moglegheiter til å studera tilhøvet mellom skog og ope landskap gjennom tid. Metoden vert testa ved å samanlikna modellert vegetasjonsdekke med vegetasjonskart. Resultata syner at kulturlandskapet ikkje har utvikla seg berre i ei retning, men med periodar med attgroing også i førhistorisk tid. Det kan vera vanskeleg å tenkja seg korleis vegetasjonen har vore i eit landskap i fortida. For å visualisera dette er ein eigen metode nytta. Undersøkinga har gjeve oss ny kunnskap om vegetasjonshistoria i regionen og menneska sin bruk av landskapet gjennom tid.

Personalia:

Ingvild Kristine Mehl (f. 1979) er oppvaksen i Rosendal i Kvinnherad kommune. Ho har ei mastergrad i biologi frå Universitetet i Bergen i 2005. Mehl har vore tilsett som universitetsstipendiat ved Universitetsmuséet, Dei naturhistoriske samlingar, og har vore ph.d.-student ved Institutt for biologi, Universitetet i Bergen. Hovudrettleiar har vore fyrsteamanuensis Kari Loe Hjelle, medan birettleiar har vore fyrsteamanuensis Aage Paus.