Korleis oppdage CO2-lekkasje på havbotnen?

Klimaendringar og global oppvarming er ei av dei største utfordingane menneska har stått ovanfor, og menneskeskapte CO₂-utslepp er hovudårsaka til den globale oppvarminga. Ei auke i folketal og velferd vil føre til ein global auke i verdas behov for energi, og fossilt brensel vil vera den dominerande energikjelda i mange år framover. Utfordinga er derfor å redusera menneskeskapte CO_2-utslepp samtidig som verdas energibehov vert dekka. Eit lovande tiltak for å redusere CO₂-utslepp er å lagre CO₂ i geologiske formasjonar under havbotnen. Eigenskapane til CO₂ fører til at CO₂ vil søke seg oppover, og eit mogleg utfall er lekkasje til havet. Sjølv om  sannsynet for lekkasje er liten, kan ein aldri vera hundre prosent sikker.  Derfor er det viktig å ha på plass gode metodar for å oppdaga ein eventuell lekkasje på havbotnen.

For å oppdaga lekkasjar er det viktig å forstå korleis CO₂ oppfører seg i havet. Då er modellen som beskriv korleis CO₂ som lekk frå havbotn vil stiga og løyse seg opp i havet viktig. Modellen er satt saman av to likningar som har ukjente verdiar som må fastsetjast ut frå eksperiment. Arbeidet i avhandlinga fastset uvissa i desse verdiane for eit gitt eksperiment, og viser korleis uvissa påverkar svaret som modellen gjer.  I tillegg vert det undersøkt korleis ein skal designe eit nytt eksperiment for å minimere uvissa.

Avhandlinga demonstrerer også korleis informasjon om moglege lekkasjeområder kan kombinerast med simuleringsdata som viser CO_2-spreiing på havbotn for å designe eit program for overvaking; korleis ein skal plassera sensorar eller ta enkle målingar på havbotn slik sannsynet for å oppdage ein lekkasje vert maksimert, samstundes som kostnadane kan holdast nede.

Personalia:

Hilde Kristine Hvidevold er fødd i 1985 og er oppvaksen på Halsnøy i Kvinnherad kommune. Ho har ein mastergrad i anvendt matematikk frå Universitetet i Bergen frå 2009. Etter mastergraden byrja ho på avhandlinga si som universitetsstipendiat ved UiB. Rettleiarar har vore Guttorm Alendal, Truls Johannessen og Trond Mannseth. Hvidevold arbeider i dag som VVS ingeniør i Sweco.