Riga Graduate School of Law og Det juridiske fakultet (ERASMUS+ - 3. og 5. studieår)

Om avtalen

Kven kan søke

Denne avtalen kan nyttast av studentar både på 3. studieår og på siste studieår av masterprogrammet i rettsvitskap.

Når i studiet kan eg reise

Studentar som starta på det femårige masterprogrammet hausten 2021 eller seinare kan reise på utveksling i vårsemesteret på tredje studieår. Under utanlandsopphaldet tek du valfrie juridiske emne i staden for emna du ville studert om du var i Bergen.

I tillegg kan alle jusstudentar, både dei på femårig og dei på toårig masterprogram, reise på utveksling i sitt siste studieår. Under dette utanlandsopphaldet fullfører du spesialemna dine, og i nokre tilfelle også masteroppgåva.

Under overskrifta "kven kan søke" finn du ut om utvekslingsavtalen gjeld for studentar på tredje eller på femte studieår, eller begge.

Språk

Undervisningsspråket er engelsk.

Kva emne kan eg ta

Ved dette universitetet kan du ta juridiske emne som blir godskrivne som valemne på 3. studieår (2021-studieordninga) eller spesialemne på siste studieår i masterprogrammet i rettsvitskap (2003-studieordninga og 2021-studieordninga).

Riga Graduate School of Law er særleg sterke innan menneskerettar, juridisk lingvistikk og internasjonal rett. På nettsida til universitetet finn du lenke til oversikt over kva emne ein kan ta som Erasmusstudent.

Riga Graduate School of Law tilbyr emne på engelsk både på bachelornivå og masternivå, men fordi ein må velje emne på eitt bestemt studieår, og det ikke er tilstrekkeleg med emne som kan godkjennast på bachelornivå, skal du ta emne på masternivå uansett om du utvekslar til Riga på 3. studieår eller på 5. studieår.
Emna på masternivå har vanlegvis undervisning på ettermiddag og kveldstid, og nokon gongar også på laurdagar.

Universitetet nyttar ECTS-systemet, og ein ECTS-credit er det same som eitt studiepoeng.

Det er ein føresetnad at emna du vel ikkje overlappar innhaldsmessig med emne du har teke tidlegare, eller planlegg å ta seinare ved UiB.

Studieavgift

Erasmus-studentar betaler ikkje studieavgift ved vertsuniversitetet, men skal registrere seg og betale semesteravgift ved UiB for heile den tida dei er ute.

Om lærestaden

Om lærestaden og byen

Riga Graduate School of Law (RGSL) er ein privat utdanningsinstitusjon, grunnlagt i 1998, som eit samarbeid mellom latviske og svenske myndigheiter og Soros Foundation i Latvia. RGSL tilbyr forskingsbasert utdanning på høgt nivå, der ein kan forvente å få undervisning både av lokale krefter, men også i nokre tilfelle av besøkande professorar og førelesarar frå Europa og USA. Campusen ligg i bydelen Alberta iela i Riga, og det noverande hovudbygget vart opna av kronprinsesse Victoria av Sverige og Latvias president i 2001.

Riga er hovudstad i Latvia, og i likskap med Bergen, ein tidlegare Hansaby. Byen har rundt 700 000 innbyggarar og ligg på ei sandslette mellom ein og ti meter over havet, ved Rigabukta, om lag midt i landet. Etter sovjettida har norske næringslivsaktørar vist iver etter å etablere seg i byen, og franchisekjeder som Narvesen, Rema 1000, Cubus og Dressmann er synlege i bybiletet.

Bustad

RGSL vil sende forslag om bustad til studentar som får opptak.

Semesterinndeling

For Interdisciplinary undergraduate:

Haustsemester: byrjinga av september til slutten av januar
Vårsemester: slutten av januar til slutten av mai