Gjeve teaterprisar til kunstnarisk forsking

Under Heddaprisen 2025 gjekk to av prisane til Tore Vagn Lid, kunstnarisk leiar av Transit-Teatret, professor ved NTNU og gjesteforskar ved Senter for vitskapsteori (SVT) ved UiB. Lid fekk prisane Beste teaterframsyning og Beste scenetekst for Triggersystemet – I: Vivariet. Han var også nominert i kategoriane Beste regi og Beste audiovisuelle design.

Kunstnarisk forsking

I tillegg til å vere eit lesedrama er Triggersystemet også eit fleirårig kunstnarisk forskingsprosjekt ved Institutt for kunst- og medievitskap ved NTNU, der SVT er ein av partnarane.  Andre partnarar er Black Box Teater i Oslo, Festspillene i Nord-Noreg, Riksteatret, Dramatikkens Hus og Kunstnerhuset Wrap. I sentrum av arbeidet står den performative, audiovisuelle realiseringa av Triggersystemet på scena. Høyr Lid fortelje om Triggersystemet som kunstnarisk forsking her:

Ei framsyning som hyllar teateret si eigenart

I grunngjevinga si berømmer juryen Triggersystemet for ein «smart, eventyraktig og underlig originaltekst som aldri er påståelig, men heller ikke redd for å være politisk», og som ei framsyning som hyllar «teatrets egenart, kraft og overlevelsesevne med et virvar av sterke og originale virkemidler. Lid seier det følgande om stykket sitt:

"Triggersystemet er egentlige den dramatiske historien om et bergingsforsøk; hvor den gamle - noen vil kanskje si, gale forskeren og professoren som selv kaller seg; «Kaptein Noah», tar med seg sine elskede insekter på en desperat flukt for å berge dyrene - og seg selv fra en storflom av kriser og kriger."

Samhøyring og bokslepp ved Senter for vitskapsteori

I januar 2025 arrangerte SVT og NTNU ei samhøyring av Triggersystemet i SVT sine kontorlokale i ærverdige Parkveien 9 for spesielt inviterte gjester. Kulturmeldar Britt Sørensen var blant desse, og skreiv det følgande på si Facebook-side:

– Når du går til en forestilling med Transiteateret, vet du at hjernevindingene dine kommer til å slå gnister. At hodet på et eller annet tidspunkt føles som om det tar fyr. Så også med «Triggersystemet», Tore Vagn Lids filosofiske lesedrama (…).

Til hausten kjem Triggersystemet i bokformat på Cappelen Damm, og då blir det boklansering i samarbeid med SVT i oktober.

Eit unikt perspektivmangfald

Rasmus Slaattelid, senterleiar ved SVT, tykkjer det er fascinerande å sjå framsyninga i eit vitskapsteoretisk perspektiv; korleis ho integrerer ulike kunnskapsformer, også vitskaplege, i eit særeige kunstnarisk formspråk der musikk, scenografi, film, dramaturgi og skodespel/lesing saman skaper eit unikt perspektivmangfald.

– Kunst kan ikkje reduserast restlaust til forsking, men kunsten kan innlemme både forskingresultat og forskinga som livsform på måtar som forskarar elles har vanskeleg for å få til.

Opnar Festspela i Nord-Noreg

I påvente av boka er det mogleg å få med seg stykket til helga, då Triggersystemet 1 & 2 er opningsframsyninga under Festspillene i Nord-Norge 21.-28. juni.

Her får publikum sjå både den første, Hedda-prisbelønna delen «Vivariet»,  som hadde premiere på Black Box Teater i Oslo i fjor, samt urpremiere på andre del: «Brunsneglens lange natt» - med Bjørn Sundquist i rolla som brunsnigelen.

Lanseringsvideo: