Eit internasjonalt synleg forskingsuniversitet
Føreord av rektor Sigmund Grønmo og universitetsdirektør Kari Tove Elvbakken.
Hovedinnhold
Universitetet i Bergen (UiB) er eit internasjonalt synleg forskingsuniversitet på fagleg høgt nivå. Forsking, utdanning og formidling er hovudmålet for verksemda, og fagleg breidde, mangfald og høg kvalitet er fundamentet.
Den målretta satsinga på kvalitet ga god internasjonal utteljing i 2009. Universitet har frå 2005 til 2009 klatra 176 plassar på den årlege universitetsrangeringa til Times Higher Education Supplement. Den gode utviklinga syner òg igjen i statistikken for forskingspublisering: Den samla publiseringa ved UiB auka med over sju prosent frå 2008 til 2009.
Klimaforskinga ved UiB får truleg økonomiske rammer til å halde fram som eit av verdas fremste miljø for forsking på klimaspørsmål. Bjerknessenteret sin status som Senter for framifrå forsking går ut i 2013, men Regjeringa vil no gi årlege løyvingar på 20 millionar kroner til å vidareføre klimaforskinga basert på Bjerknessenteret sin kompetanse.
2009 disputerte 223 kandidatar innanfor doktorgradsprogramma. UiB lukkast med å rekruttere yngre, utanlandske forskarar. Om lag 30 prosent av dei nye doktorane er utanlandske, og bidreg til å synleggjere UiB som et internasjonalt forskingsuniversitet.
I 2009 blei planane om å rehabilitere den monumentale hovudbygningen ved Bergen Museum til eit flott kultur-, formidlings- og representasjonsbygg godgjort med 30 millionar frå regjeringa. Monumentalbygget blei særskilt omtala i statsbudsjettet og departementet har bede Statsbygg om å planlegge og gjennomføre rehabiliteringa med sikte på å gjere det ferdig til grunnlovsjubileet i 2014, slik universitetet ønskjer.
Universitetet i Bergen hadde i 2009 ei auke på 13 prosent i talet på søkarar. Dette er over det nasjonale gjennomsnittet, og illustrerer at UiB framleis er ein av dei mest ettertrakta utdanningsinstitusjonane i landet.
I 2009 blei arbeidet med å fornye UiBs strategiske plan for 2011-2015 sett i gang, med hovudmål om å markere UiB i enda større grad som eit internasjonalt synleg forskingsuniversitet.
Sigmund Grønmo, rektor
Kari Tove Elvbakken, universitetsdirektør
