Selja kloster og helgenanlegg
Gjennom 3D-animasjon kan du no oppleve Selja kloster og helgenanlegg slik det såg ut på byrjinga av 1300-talet, då det var på sitt mest aktive.
Hovedinnhold
Kloster- og helgenanlegget på øya Selja i Nordfjord var eit av dei viktige kyrkjelege monumentalanlegga og kyrkjesentera i norsk mellomalder – og utvilsamt det mest særeigne.
Her finn me eit av dei eldste norske klostera og det eldste bispesetet på Vestlandet, begge grunnlagde heilt tilbake på 1000-talet. Her finn me også martyrstaden for dei fyrste norske helgenane, St. Sunniva og Seljumennene, som etter legenda vart drepne på 900-talet og funne av kong Olav Tryggvason i 996.
Etter den tid og like opp til i dag har Selja vore sett på som ei heilag øy. Det kyrkjelege anlegget på Selja har altså ei like lang soge som kristendommen har det i Noreg. Før den tid kan det ha vore ein førkristen heilagdom på øya, men dette veit me ikkje.
I vår tid ligg mest berre låge, meir eller mindre restaurerte murrestar att av bygningsanlegga frå mellomalderen. Korleis såg heile det kyrkjelege anlegget ut då det i si velmaktstid stod fullt utbygd ein gong på 1300-talet?
Klikk deg gjennom anlegget
Via 3D-animasjon kan du sjå korleis det kan ha sett ut på Selja kloster og helgenanlegg i mellomalderen. Via mobil eller PC kan du klikke deg rundt i anlegget og sjå det frå både utsida og innsida.
- Sjå dei digitale visualiseringane her (grind.no)
Tidsbiletet er lagt til 1320-åra, 700 år før vår tid. Grunnformene, i alle fall av det som var steinkonstruksjonar i anlegget, er i dag stort sett bevarte og kjende. Gjennom forskinsbaserte vurderingar og meir eller mindre sannsynlege forklaringsalternativ, har prosjektet forma heile hus på murrestane og liv og miljø i anlegget.
Sjå video
Animasjon av rekonstruksjon av Selja kloster på tidleg 1300-tal.
Visualisering av Selja kloster- og helgenstad
Selja kloster
Stad kommune har saman med Universitetet i Bergen og Arkikon laga ein 3D-animasjon av Selja kloster og helgenanlegg slik det såg ut på byrjinga av 1300-talet, då det var på sitt mest aktive.
Bidragsytarar i prosjektet
Stad kommune er initiativtakar og prosjekteigar for arbeidet med det digitale Selja kloster og helgenanlegg.
Framstillingane er utarbeida av Arkikon.
Tverrfagleg forsking ligg til grunn for bileta av Selja kloster og helgenanlegg, og det faglege arbeidet er koordinert av Mellomalderklynga ved UiB. Vi vil rette ei stor takk til forskarane Alf Tore Hommedal og Marit Nybø (emerita) frå UiB og Regin Meyer frå NIKU som har bidrege med sin fagkunnskap.
Prosjektet er støtta av Riksantikvaren.
