Ein politisk epistemologi for helse- og miljørettferdskonfliktar
I dette seminaret tek Silvio Funtowicz føre seg Martinez-Alier sitt argument om at Miljørettferdsatlaset illustrerer mobiliseringa av såkalla «extended peer communities” slik dei blir definerte i postnormal vitskap.
Hovedinnhold
Holbergprisen, ein av dei største internasjonale prisane som årleg blir tildelt forskarar innanfor fagfelta humaniora, samfunnsvitenskap, jus og teologi, gjekk i 2023 til den katalanske forskaren Joan Martinez-Alier.
Martinez-Alier er professor emeritus ved Institute of Environmental Science and Technology, Universitat Autònoma de Barcelona (ICTA-UAB). Han kjem til å ta i mot prisen under ein seremoni i Universitetsaulaen i Bergen 8. juni.
Martinez-Alier får prisen for si banebrytande forsking innanfor økonomi, politisk økologi og klimarettferd. Han er kjent for å kritisere rådande økonomisk teori og den dominerande forståinga av økonomisk vekst. Han har også ein framståande posisjon både som fagperson og offentlig intellektuell innanfor den stadig vaksande rørsla for agroøkologi og "nedvekst" ("degrowth").
I dette seminaret kjem Silvio Funtowicz til å ta føre seg Martinez-Alier sitt argument om at Miljørettferdsatlaset ("Environmental Justice Atlas") illustrerer mobiliseringa av såkalla "extended peer communities” (EPC-ar) slik dei blir definerte i postnormal vitskap (PNS).
EPC-ar er fora der eit mangfald av perspektiv, kunnskapssstilar og maktforskjellar kjem til uttrykk i ein kontekst av ekstrem ulikheit og urettferd, svake demokratiske institusjonar, autoritære tendensar og ein magisk idé om kraften i vitskap og teknologi.
PNS er ein politisk epistemologi for helse- og miljørettferdskonfliktar prega av omstridde fakta, eit mangfald av verdiar, mykje som står på spel, og avgjerder som hastar. I helse- og miljørettferdskonfliktar er ikkje kunnskapsoverføring lenger berre vitskaplege og tekniske ekspertar sitt domene, men har blitt ein naturleg del av kampen til dei aktuelle lokalsamfunna når dei går i mot makta og gjer krav på rettane sine.
Webinaret er ope for alle interesserte, og for å delta treng du berre å klikke på Zoom-lenka kl. 12.00, måndag 8. mai.
--
Silvio Funtowicz var professor II ved Senter for vitskapsteori (SVT) ved UiB frå februar 2012 til våren 2021 og er no gjesteforskar her. Han er ein vitskapsfilosof som har vore aktiv innanfor feltet vitskaps- og teknologistudiar (STS). Saman med Jerome R. Ravetz introduserte han konseptet post-normal vitskap (PNS) på 1990-talet.
