Forskingsfordjupning i kunsthistorie: feltarbeid, fagmiljø og fellesskap

Mål:

I dette emnet lærer studentane om kunsthistorisk fagmiljø og fellesskap gjennom å delta i eit større forskingsprosjekt. Tema og ramme varierer frå år til år. Dei aktuelle prosjekta kan vere individuelle eller kollektive forskingsprosjekt i det kunsthistoriske fagmiljøet og/eller offentlege kunst- og kulturinstitusjonar og andre kunnskapsbedrifter i Bergen. Studentane lærer å planlegge og gjennomføre sjølvstendige oppgåver innanfor rammene av det gitte prosjektet. Gjennom emnet vert studentane introduserte til ulike kunsthistoriske forskingskulturar, og dei vil få innblikk i fagleg prosjektplanlegging gjennom deltaking på ulike forskingsaktivitetar.

Før semesterets oppstart vert studentane presenterte for det aktuelle/dei aktuelle forskingsprosjekta. Ved semesterstart vil dei òg få informasjon om kva for oppgåver som kan vere aktuelle på emnet. Utvalet og type oppgåver det er snakk om, varierer frå år til år avhengig av forskingsprosjekt. Arbeid som inngår i oppgåva, kan til dømes vere feltarbeid, innsamling, organisering og klassifisering av arkiv eller anna empirisk materiale, litteraturgjennomgang knytt til eit teoretisk eller anna kunsthistorisk problem, og liknande.

Studentane gjer avtale med emneansvarleg om oppgåver innanfor ramma til det aktuelle forskingsprosjektet. Studenten må formulere ein prosjektplan for semesteret som skal godkjennast av den faglege kontaktpersonen.

Mål for emnet er at studentane skal opparbeide ferdigheiter som er relevante for ei rekke delar av arbeidslivet. Dei vil mellom anna ha erfaring med prosjektplanlegging og gjennomføring av faglege oppgåver, både sjølvstendig og i grupper. Dei vil ha erfaring med å avgrense og utvikle prosjekt av kunsthistorisk karakter, nærme seg faglege problemstillingar med kritisk blikk, og skrive ulike tekstar knytte til prosjektet.

Studenten skal ved avslutta emne ha følgjande læringsutbyte: Emnet gir spesialkompetanse i kunsthistorie innan eit aktuelt forskingsfelt, og skal bidra til å utvikle analytiske evner og teoretisk og metodisk refleksjon. Emnet gir ein introduksjon til allmenn forskingskompetanse som kan komme til bruk ved seinare arbeid med masteroppgåva og i kunst- og kulturinstitusjonar og kunnskapsbedrifter av ulike slag.

Kunnskap

Studenten

• har inngåande kunnskap om eit definert og avgrensa kunsthistorisk forskingsemne eller ei metodisk problemstilling innanfor rammene til eit forskingsprosjekt.
• har kunnskap om ulike aspekt ved eit forskingsprosjekt på eit universitet og/eller ein kunst- og kulturinstitusjon eller andre kunnskapsbedrifter.

Ferdigheiter

Studenten

• kan løyse fagleg relevante problemstillingar innan prosjektplanlegging og gjennomføring.
• kan formulere ein prosjektplan for forskingsrelaterte oppgåver om eit kunsthistorisk tema.
• kan arbeide sjølvstendig og i team med forskingsrelaterte oppgåver.

Generell kompetanse

Studenten

• har innblikk i ulike aspekt ved kunsthistorisk forsking, nasjonalt eller internasjonalt (planlegging, gjennomføring og formidling).
• har overblikk over ulike forskingskulturar innan kunsthistorisk relatert forsking på eit universitet og/eller ein kunst- og kulturinstitusjon eller andre kunnskapsbedrifter.