Arbeider for lik tilgang til musikkterapitenester

Bakgrunn

I Vestlandsregionen er det ei lang historie for fylkeskommunalt engasjement for utvikling av musikkterapifeltet. Sogn og Fjordane fylkeskommune var t.d. ein aktiv pådrivar for etableringa av prøveordninga «Gloppen-prosjektet» i 1983 og for oppstarten av ei musikkterapiutdanning på Sandane i 1988.

Etter fylkesfusjonen i 2020 er dette arbeidet vidareført og vidareutvikla av Vestland fylkeskommune. Eit Fylkestingsvedtak i juni 2025 legg til rette for auka fylkeskommunalt engasjement på musikkterapifeltet, både som samfunnsutviklar og tenesteutviklar.

Partssamarbeid Vestland

Partssamarbeidet er i utvikling og arbeider frå og med hausten 2025 etter Polyfons nye ordning for undergrupper, ei ordning som gjer det lettare for kommunane å delta i eit samarbeid om utvikling av solide musikkterapitenester.

Følgjande instansar er med i Partssamarbeidet per august 2025:

• Vestland fylkeskommune (fullmektig/koordinator for samarbeidet)
• Helse Førde
• Utviklingssenter for sjukeheimar og heimetenester (USHT), Vestland (Sogn og Fj.)
• Kinn kommune
• Ullensvang kommune
• Vaksdal kommune
• Voss herad 

Fagleg aktivitet

Som koordinator for Partssamarbeidet, har Vestland fylkeskommune utvikla tiltak som t.d.:

• Rådgjeving om fagutvikling, søknadar om tilskot og/eller om oppretting av musikkterapeutstillingar
• Kunnskapsformidling gjennom konferansar og seminar
• Kunnskapsdeling og -utvikling, t.d. gjennom nettverk og samarbeidsforum
• Politikkutvikling på området.

USHT Vestland (Sogn og Fjordane) er ein aktiv medspelar i dette arbeidet.

Deltakarane i Partssamarbeidet er sjølve aktive i å setje tema på dagsordenen, både for nettverksarbeid, konferansar og seminar. Somme aktørar i Partssamarbeidet har også vore aktive medspelarar i forskingsprosjekt initierte av deltakarane i kunnskapsklynga Polyfon.