Søk om utviklingsstøtte

Som ein del av Prosjekt OPPTAKT og med støtte frå Agenda Vestlandet, Sparebanken Norge, har Polyfon etablert ei ordning for utviklingsstøtte: Klyngedeltakane er velkomne til å søkje om utviklingsstøtte til prosjekt som kan auke bruken av og styrke kvaliteten i praksis og tenester.

Søknader vert evaluerte av ein ekstern komité. Det vert lagt opp til rask sakshandsaming.

Sekretariatet og/eller klyngas regionale fagkoordinatorar gjev gjerne råd til deg som arbeider med søknadar og prosjekt. Ta kontakt! 

Generell informasjon

Søknader skal innehalde ei prosjektskisse med tydeleg beskriving av mål og behov, framgangsmåte og forventa resultat. I det digitale søknadsskjemaet ligg det ei avgrensing på maks 1600 ord for prosjektskissa, medan andre punkt har ei avgrensing på maks 100 ord. Feltet for litteraturreferansar har inga avgrensing.

Aktuelle søknadssummar er avgrensa nedover til kr. 20 000, – og oppover til kr. 150 000,-.

Ved tilslag vert støtte utbetalt til søkjande klyngedeltakar, som forvaltar tildelinga.

Søknaden sender du inn på det digitale søknadsskjemaet <lenke vert lagt ut her>

Kva kan ein søkje om støtte til?

Både kunnskapsgrunnlag, retningslinjer, brukarønske og samfunnsøkonomiske vurderingar tilseier at bruken av musikkterapi bør oppskalerast og kvalitetssikrast både i helse- og sosialtenestene og i barnehage- og skulesektor.

• Ein kan søkje Polyfon om utviklingsstøtte for å kartleggje behov, undersøkje brukarerfaringar, byggje samarbeidsnettverk, utvikle og dokumentere metodikk og/eller utvikle planar for implementering og kvalitetssikring av musikkterapi
• Det er ikkje midlar til at ein kan søkje om støtte til utøvande musikkterapeutstillingar, men det er mogeleg å søkje om støtte til å honorere musikkterapeutar, erfaringskonsulentar, studentar eller andre som kan bidra som ressurspersonar i ein utviklingsprosess i ein avgrensa periode.
• Søknader om utviklingsstøtte med vekt på praksis og tenester kan om ønskjeleg sjåast i samanheng med søknader om forskingsstøtte og/eller formidlingsstøtte.

Retningslinjer ved vurdering av søknader

Vurderingskomiteen arbeider etter følgjande retningslinjer:

• Eit utviklingsprosjekt innan denne støtteordninga må ha som mål å leggje grunnlag for meir og/eller betre musikkterapipraksis. Tiltaka som skal utviklast må gjerne sjåast i samanheng med andre helse- og utviklingsrelaterte musikkpraksisar
• Prosjektkvalitet er eit hovudkriterium ved vurdering, der tydeleg beskriving av mål og behov, framgangsmåte og forventa resultat er viktig. Samtidig vert det gjort ei heilskapleg vurdering ut i frå klyngas visjon, verdiar, målsetjingar og satsingar
• Utviklingsprosjekt skal ta omsyn til eksisterande kunnskap om musikkterapi, i tillegg til lokale behov og brukarønske
• Søknader må vise at det blir lagt til rette for brukarmedverknad så langt dette er mogeleg og relevant, jf. Polyfon sin rettleiar for brukarmedverknad
• Der det er relevant, kan søknader gjerne leggje til rette for samarbeid med andre klyngedeltakarar og med formidlingsprosjekt og/eller forskingsprosjekt (t.d. master- eller ph.d.-prosjekt)
• Søknader skal vere godkjende av leiinga hjå aktuell klyngedeltakar. I det digitale søknadsskjemaet lastar de opp ein e-post der leiinga stadfestar 1) at den konkrete søknaden er godkjent, og 2) at aktuell klyngedeltakar tar ansvar for å ta i vare eventuelle problemstillingar knytte til personvern og etikk.