Praksis i sammenliknende politikk

Vestland fylkeskommune

Vestland fylkeskommune har i mange år teke imot praksisstudentar knytt til forskjellige avdelingar og prosjekt. Hausten 2024 er praksisplassen i Vestland fylkeskommune knytt til kommunerevisjon, med problemstillingar rundt kommunelova, lokaldemokrati, kommunal- og regional forvaltning, og politisk og økonomisk styring.

Foto/ill.:

Vestland fylkeskommune

Hovedinnhold

Om arbeidsplassen

Vestland fylkeskommune er ein av regionens største arbeidsgjevarar med over 6 000 tilsette lokalisert i heile fylket. Studentpraktikanten vil få ein mentor i fylkeskommunen som har hovudfag (mastergrad) i samanlikande politikk, og ph.d. i offentleg politikk. Mentor har hatt ei rekkje praktikantar tidlegare, og har brei metodeerfaring.

Døme på tidlegare studentar sin praksis:

Studentpraktikanten vil få eigen arbeidsplass i Vestlandshuset (fylkeskommunen sitt administrasjonsbygg sentralt i Bergen), men må pårekne nokre besøk til kommunar som sekretariatet har oppdrag for. Reiser vil bli dekka.

Praktikanten må signere tausheitserklæring. Det vil ikkje vere krav om at studenten skriv rapport på nynorsk.

Om Vestland Fylkeskommune

Fylkeskommunen leverer tenester knytt til vidaregåande opplæring, samferdsel, tannhelse, næringsutvikling, kultur og klima og miljø. 

Fylkeskommunen er ein politisk styrt organisasjon med fylkestinget som øvste organ, fylkesordførar som øvste politiske leiar, og fylkesdirektør som øvste administrative leiar.

Aktuelle problemstillingar og metodar

Praktikanten vil ta del i det daglege sekretariatsarbeidet, men det er også forventa at hen utarbeider ein rapport/analyse av relevans for kommunal/fylkeskommunal kontroll. Praktikanten inviterast til å utarbeide problemstilling basert på eiga utdanning, interesser og ambisjonar, men aktuelle problemstillingar kan vere:

Kontrollutvala og kommunal eigenkontroll si betydning for lokaldemokratiet, og forholdet til statleg tilsyn og styring
Politiske og/eller administrative konsekvensar av funn frå revisjonane
Kost-/nyttevurderingar av kontroll- og revisjonsarbeidet
Omfanget av kontroll og revisjon opp mot andre kommunale tenesteområde
Konsekvensar av endringane i kommunelova i 2018
Case-studiar på korleis ein eller fleire forvaltningsrevisjonar gjennomførast og blir følgd opp
Samanlikning av kontrollarbeidet mellom kommunar

Anna knytt til lov, organisering, leiing, prosess, måloppnåing

Metodisk står praktikanten også fritt, men det er truleg mest aktuelt med kvalitative metodar som prosesskartlegging, dokumentanalysar, mindre spørjeundersøkingar og intervju med sentrale interessentar som ordførarar, kommunedirektørar, revisorar og medlemmer av utvala. Av kvantitative analysar vil analysar av KOSTRA-tal kunne vere aktuelt

Kontrollutvala si rolle

Kontrollutvala er folkevalde organ som fører kontroll med den kommunale og fylkeskommunale forvaltninga på vegne av kommunestyre og fylkesting, og ser til at det blir gjennomført forsvarleg revisjon. Dette består både av tradisjonell revisjon av rekneskap, men også av forvaltningsrevisjon (som er å gjennomføre systematiske vurderingar av økonomi, produktivitet, regeletterleving, måloppnåing og verknader ut frå kommunestyret eller fylkestinget sine vedtak), av eigarskapskontroll (som er å kontrollere om kommunen eller fylkeskommunen sine eigarinteresser blir ivareteke), og av andre kontrolloppgåver.

Kontrollutvala skal gjennom arbeidet sitt bidra til at innbyggjarane og andre interessentar har tillit til den offentlege forvaltninga, og at kommunane og fylkeskommunen leverer tenester og utfører mynde effektivt og målretta i samsvar med lov, forskrift og andre reglar, samt politiske vedtak.

Kontrollutvala har eit eige sekretariat som er direkte underlagt kvart utval, og er adskilt frå, og uavhengig av, den øvrige administrasjonen i kommunane. Sekretariatet er også uavhengig av revisor for kommunen/fylkeskommunen. Vestland fylkeskommune sitt sekretariat er for tida sekretariat for to fylkeskommunar og 14 kommunar. Dei fleste kommunane som vi er sekretariat for har konkurranseutsett revisjonen. For tida er revisjon levert frå Deloitte, BDO og Vestlandsrevisjon.

Sekretariatet er kontrollutvala sin viktigaste hjelpar og støttespelar. Eit velfungerande sekretariat er ein føresetnad for at kontrollutvala skal kunne utføre sin lovpålagte kontrollfunksjon på ein god måte.

12.04.2024