Takk til (fjor)årets bergensar!
Med støtte frå GC Rieber Fondene kan Polyfon lyse ut 6 tverrfaglege sommarstipend for studentar. Det gjev eit løft til arbeidet med å byggje ein tverrfagleg kultur. Vi takkar Fondene og Christian Rieber!
Main content
Eit avgjerande samarbeid
Sidan musikkterapifaget vart etablert ved Universitetet i Bergen i 2006, har vi svært mange gonger opplevd at det har vore mogeleg å ta nye løft takka vere GC Rieber Fondene.
Vi har erfart at eit internasjonalt orientert breiddeuniversitet kan vere ein svært god vertskapsinstitusjon for musikkterapifaget, men også at denne type universitet har fleire reiskapar for å løfte etablerte fag enn nye, uferdige fag. Då har støtta frå GC Rieber Fondene, somme gonger i samspel med Grieg Foundation, vore heilt avgjerande.
Kunnskapsklynga Polyfon handlar ikkje om UiB, men spring ut av UiB, og GC Rieber Fondene har vore med på å gje oss kraft til å ta nasjonale initiativ. Den støtta vi har fått opp gjennom åra har vore med på å løfte både utdanning, forskingssenter og kunnskapsklynge.
For Polyfons del handlar det både om Nasjonalt nettverk for musikkterapi og eldrehelse (2008-2014), som var ein forløpar for Polyfon-samarbeidet, og det handlar om den store tildelinga som gjorde oppstarten av kunnskapsklynga mogeleg i 2015.
Det er forresten slik at fleire av klyngedeltakarane også kvar for seg har fått støtte frå GC Rieber Fondene, til utvikling av kunnskap, tilbod og tenester.
Eit personleg engasjement
Polyfon vart altså etablert i 2015 og kan feire 10-års-jubileum i 2025. Ein sentral medspelar heilt sidan dei første sonderingane i 2013 har vore Christian Rieber, mangeårig styreleiar i GC Rieber Fondene og framleis ein engasjert samtalepartnar med sine 99 (!) år.
Christian er ikkje ein mann som søkjer merksemd om eigen person, men litt merksemd får han heldigvis. Same året som Polyfon vart etablert fekk han Christieprisen for si mangeårige støtte til både klima- og helseforsking, inkludert musikkterapi.
I fjor, like før nyttår, vart han kåra til årets bergensar. Velfortent, sjølvsagt! For oss har han vore årets bergensar i over 20 år. Vi sluttar oss til gratulantane og takkar for eit fantastisk samarbeid!
For oss har han vore årets bergensar i over 20 år
Sommarstipend for studentar
Då Christian Rieber fekk Christieprisen i 2015 gav han prispengane vidare til Polyfon. Det vart starten på klyngas ordning med å lyse ut sommarstipend for musikkterapistudentar.
Med støtte frå GC Rieber Fondene kan vi no også tilby tverrfaglege sommarstipend for studentar.
For meir informasjon, retningslinjer og søknadsskjema for begge type stipend, sjå Søk om sommarstipend.
