Fagstrategi for spansk språk og latinamerikastudium

Status
Ved inngangen til 2026 har faget følgjande faste stillingar:

• Ei 100% professorstilling i latinamerikansk litteratur
• Ei 100% førsteamanuensisstilling i spansk fagdidaktikk
• Ei 100% førsteamanuensisstilling i spansk språk. Denne stillinga skal etter bemanningsplanen dragast inn ved avgang for alder, seinast i august 2029.
• To 100% førsteamanuensisstillingar i latinamerikansk historie. Den eine av desse har frikjøp heile 2026, hausten 2027 og våren 2028.
• Ei 50% lektorstilling i spansk språk
• To 20% lektorstillingar i latinamerikansk kultur. Den eine av desse har permisjon utan vikar våren 2026.
• Ei 20% lektorstilling i latinamerikansk litteratur 
• Ei 10% lektorstilling i spansk språk

I tillegg vil faget etter planen ha følgjande midlertidige stillingar:

• Ei 50% lektorstilling i 2026 i latinamerikansk historie/kultur (vikar for frikjøp)
• Ei 20% bistilling 2026-2027 i latinamerikansk historie/litteratur/kultur
• Ei 20% bistilling 2026-2027 i spansk språk
• To PhD-kandidatar som er ferdige med undervisningsplikta og etter planen skal levera i løpet av perioden.
• Ein PhD-kandidat som har stipend august 2025-juli 2029.

Dette vil seia at faget har 160% stilling fordelt på sju personar. Desse personane har sine hovudstillingar andre stader og det er for nokre vanskeleg og for andre umogeleg å koma til campus. Det tyder at dei sju personane vanskeleg kan nyttast i stadbunden undervisning, at dei faste førstestillingane ikkje har møtepunkt med delstillingane og at dei dermed i svært liten grad bidrar til fagutvikling og fagmiljø. Det er dessutan stor usikkerheit knytt til kva som skjer om ein av dei faste delstillingane sluttar, men det er tvilsamt om denne då vert erstatta.

Faget har følgjande obligatoriske program:

• BAHF-SPLA -Bachelorprogram i spansk språk og latinamerikastudium
• MAHF-SPLA -Masterprogram i spansk språk og latinamerikastudium
• ÅRHF-SPLA -Årsstudium i spansk språk og latinamerikastudium
• MAHF-LÆFR -Lektorutdanning med master i framandspråk, der spansk språk og latinamerikastudium kan vera fag 1 eller fag 2

Det er ingen valfrie emne i nokon av programma.

I tillegg har faget

• Lærarutdanning (tidlegare KfK) finansiert av Udir som tek opp om lag 55% lektorstilling. Det er uklart i kva grad det er obligatorisk for spanskfaget å gi desse emna og kor lenge det skal vara.
• Emna i årsstudiet ligg også ute som EVU-emne med online undervisning på ettermiddag.

Desse emna gir om lag halvparten av studiepoenga faget produserer på 100-nivå og tek opp om lag 60% lektorstilling.

Forsking
Faget har i perioden eitt stort forskingsprosjekt, DARKLAX, leia av Ernesto Semán. Det er også søkt om eitt anna NFR-prosjekt der ein enno ikkje har fått svar. Det vil også bli søkt om eit ERC-prosjekt. 
Med ulike fagdisiplinar, er også forskingsinteressene til dei fem faste tilsette med forskingsdel i stillingane sine, ulike. Alle samarbeider med forskarar ved andre institusjonar i Noreg og i utlandet. Medan DARKLAX er tverrfagleg med rot i environmental humanities, forskar andre på tolking, omsetjing, litteratur, historie eller fagdidaktikk. Faget ser det som rett og viktig at alle held fram med sine samarbeid innan sine disiplinar. Meir enn to-tre store forskingsprosjekt på eit fag med (snart) fire faste førstestillingar ville også vera vanskeleg å handtera med tanke på kontinuitet i campusaktivitet. Det er difor ikkje planar om å søkja fleire store prosjekt i perioden.

Undervisning
Faget har få stabile undervisningsressursar som er til stades på campus og det er såleis vanskeleg å arbeida jamnt med utvikling av studieportefølje. Faget står også etter planen utan førstekompetanse i språk like etter at perioden for denne strategiplanen går ut, og vil dermed ikkje kunna tilby undervisning i lingvistikk på 200- og 300-nivå eller rettleiing i lingvistikk på BA-, MA- og PhD-nivå, og heller ikkje forskingsbasert undervisning i disiplinen. Dette påverkar naturleg nok utviklinga av studieporteføljen.

Det same gjer store reformer som ny lektormodell og HF sitt studieporteføljeprosjekt. Desse styrer i stor grad kva me må gjera utan at dette nødvendigvis er det fagmiljøet meiner er best for faget, og pålegg bruk av ekstra ressursar som t.d. 15 stp meir undervisning på lektorprogrammet. I ein periode er det også dobbel undervisning på gamal og ny lektormodell utan at ressursar er tilført. Som før nemnt, underviser ein no på campus utelukkande på emne som er obligatoriske i BAHF-SPLA, MAHF-SPLA og ÅRHF-SPLA (same emna som i BAHF-SPLA) og MAHF-LÆFR. I tillegg har me eit online-tilbod gjennom det tidlegare KfK og EVU. Om lag halvparten av studiepoenga faget produserer på 100-nivå, kjem frå EVU-emna. Faget ynskjer å vidareutvikla online-tilbodet til også å gjelda 200- og 300-nivå og ser eit stort potensiale med tanke på å produsera endå fleire studiepoeng og også grader, men dersom me skal forhalda oss berre til faste stillingar, at faget skal tilby det som før heitte KfK og at stillinga i språk forsvinn i 2029, er det ikkje mogeleg å utvida EVU-porteføljen slik det er no. Det er også EVU-emna som først må strykast dersom faget må kutta i undervisninga. Alle emne har ei minimumsundervisning som ligg langt under norma dei har på t.d. UiO (totalt 42 t/veka på 30 stp på UiO mot 28 t/veka hjå oss), og det er ikkje mogeleg å kutta ytterlegare.

Prioriteringar for framtidige tilsettingar
Faget ynskjer først og fremst å få erstatta førsteamanuensisstillinga i spansk språk som etter bemanningsplanen forsvinn i løpet av dei neste par åra. Utan ei slik stilling, vil ikkje spansk språk og latinamerikastudium på Institutt for framandspråk kunna tilby undervisning og rettleiing i språk/lingvistikk over 100-nivå og kan heller ikkje forska innan språkdisiplinen. Ideelt sett skulle faget i tillegg hatt ein 100% allround-lektor som kunne undervisa både på campus og online på innføringsemna og på 100-nivå. Dette ville gi ein mykje større grad av stabilitet og kontinuitet enn det me no opplever.

Konklusjon

• Faget har fragmenterte undervisningsressursar og ein fragmentert studieportefølje. Det første gjer det vanskeleg å arbeida systematisk og kontinuerleg med studieporteføljen. Det andre gjer at me hausten 2025 var det faget på IF som hadde flest registrerte studentar. Det er dessutan usikkert korleis ressurssituasjonen vert framover. Men faget ynskjer:
• Å utvikla EVU-porteføljen på 200- og 300-nivå. Dette krev meir og meir stabile ressursar.
• Å få erstatta stillinga som skal trekkjast inn ved avgang seinast i 2029.
• Å styrkja undervisningsressursane med ein allround-universitetslektor.