Ferdig med graden din?

Gradsseremoni ved Det humanistiske fakultet

HF arrangerer gradsseremoni for våre bachelor- og masterkandidatar mot slutten av vårsemesteret kvart år. På gradsseremoniane vil vi heidre våre kandidatar med musikk, helsingar frå dekan og alumnar og ei hyggeleg stund med andre studentar frå fakultetet. På gradsseremonien kan du feire saman med dine medstudentar og det er mogleg å ha med seg familie/vener. Studentar som er i ferd med å bli ferdig med grada si får invitasjon til gradsseremonien. 

Vitnemål frå Det humanistiske fakultet

Grunnlaget for vitnemålet er utdanningsplanen, og vitnemålet blir produsert når den er fullført. Du kan sjå utdanningsplanen din i Studentweb. Om du ønsker å gjere endringar i planen, kan du kontakte studierettleiaren for programmet ditt.

Fristane for å gjere endringar i planen er 15. juni om du fullfører graden i vårsemesteret, og 15. januar om du fullfører graden i haustsemesteret.

Når kan du få tilgang til vitnemålet ditt?

Ditt digitale vitnemålet blir produsert 8-12 veker etter at du fullfører ein grad, dette kan du lese meir om på UiB si nettside om vitnemål og karakterutskrift.

Vitnemål blir produsert etter at klagefristen er gått ut, og du kan ikkje få det utstedt tidlegare. Dersom du treng dokumentasjon på graden før det, kan du anten bruke Vitnemålsportalen, eller be studierettleiaren på programmet ditt om ei stadfesting på oppnådd grad. Studentar som fullførte graden før 2016, eller som har teke ein grad utan utdanningsplan, må bestille vitnemålet gjennom bestillingsskjema.

Utskrift av papirvitnemål

Dersom du treng papirvitnemål, så kan du bestille det i skjema du finn på UiB si nettside om vitnemål og karakterutskrift. Merk at papirvitnemål blir skrive ut fire gangar i året, i januar, april, september og desember. Papirvitnemål kan anten hentast på Infosenteret ved HF eller du kan få det tilsendt i posten. Dette kan du melde i frå om i bestillingsskjemaet. Hugs legitimasjon om du skal hente det ut i Infosenteret.