Arkeologistudentar på hospitering i fylkeskommunen

Saken er skrevet og først publisert av Vestland fylkeskommune, se lenke nederst på siden.

Vi må vere med og gje studentane praktisk erfaring frå arbeidslivet, og syne dei kva dei kan vente seg i andre enden av utdanninga. Og sjølvsagt er det eit mål å syne fram Vestland fylkeskommune som ein attraktiv arbeidsgjevar.

Det seier David Sandved seksjonsleiar for kulturarv, om kvifor fageininga for feltarkeologi kvart år tek imot nye masterstudentar i arkeologi. I haust har til saman seks studenter hospitert, og dei har fått prøve seg i både felt og med formidling.

Steinalderbuplass ved Flesland

Fire av dei var med på arkeologisk feltarbeid ved Flesland flyplass. Der sila dei massar som var gravne opp frå ein steinalderbuplass. Dei fann spor frå steinalderen laga i ulike typar stein og fekk praktisk røynsle i å lese landskap.

Siste dag var studentane med på feltarbeid på Tellevik. Dei grov med spade etter dyrkingslag og undersøkte eit lite skogholt. To studentar fann eit lag, og med det lærte dei verdien av ulike metodar i feltarkeologien.

Det var interessant å lære om kva arbeidsoppgåver ein arkeolog kan ha i fylkeskommunen, og å få bli med ut i felt. Eg trur vi alle godt kunne tenke oss å være med ei veke til. Det var verkeleg gjevande å delta på utgravinga på Hamm og på Tellevik,

seier masterstudent Hallvard Vestbø. 

Underviste for 4. klasse

I veke 35 var to studentar med arkeolog Louise Bjerre Petersen frå fylkeskommunen og arkeolog og museumspedagog Espen Kutschera frå Bymuseet i Bergen på eit undervisningsopplegg i Vargavågen i Os. Studentane fekk prøve seg på formidling og undervisning av elevar frå 4. trinn i Bjørnafjorden kommune. 

Hospiteringsordninga mellom Vestland fylkeskommune og AHKR har som mål å gje studentar røynsle med arbeidslivet som ventar etter masterutdanninga. Dette var første gong studentar var med på formidlingsopplegg, og det vart ein suksess, ifølgje arkeolog Louise Bjerre Petersen. 

Kulturmiljøet i Vargavågen i Os er unikt for formidling i nærmiljøet til skuleelevane. Her finst ulike kulturminne, mellom andre helleristingar frå bronsealderen og klebersteinbrot med aktivitet frå vikingtid til moderne historisk tid. 

Alt i alt var hospiterina ei uvurderlig erfaring for meg. Eg fekk oppleve korleis arkeologi kan formidlast på ein måte som gjer at barn og unge får eigarskap til fortida og kulturminna rundt seg,

seier masterstudent Oliver Malo Torheim.