Tannbehandling av vaksne, diverse tema

Dette kurset inneheld kliniske tema som grunna vanskegrad og/eller kontinuerleg kompetansestige er lagt til siste studieår, samt tema som skal førebu studenten til overgangen mot arbeidslivet.

Målet med emnet er at studenten skal tileigne seg kunnskap og praktiske/kliniske ferdigheiter som gjer han/ho i stand til å ivareta pasientgrupper med spesielle behandlingsbehov og pasientar som ønskjer estetisk tannbehandling. Emnet skal også gje kunnskap om pasientar sine tannhelsetilbod og rettar. Emnet skal i tillegg gje ein oversikt over tannlegen sin arbeidsmarknad, mogelegheiter og rettar, og i tillegg ha fokus på utviklingstrender av faget i et framtidsperspektiv.

Emnet tek for seg følgjande tema:

• Pasientar med spesielle behov
  • Oral helse ved sjeldne diagnosar
  • Risikopasientar og sanering
  • Søvnmedisin/behandling av søvnapnoe
  • Temporomandibulær dysfunksjon (TMD)
  • Ernæring
• Gerodontologi
  • Geriatri - generell aldring, spesifikke alderssjukdommar, medisinske risikopasientar
  • Etikk - informert samtykke, pasientrettar, bruk av tvang
  • Førebyggjing - rotkaries, hyposalivasjon
  • Adhesive restaureringar hos eldre
  • Protetikk hos eldre, reparasjonar, stomatitt
  • Samarbeid med andre helseprofesjonar
  • Munn- og tannstell i institusjon og i heimebasert teneste
  • Spesielt munnstell
• Omfattande orale rehabiliteringar
  • Protesereparasjonar
  • Immediatproteser
  • Kombinasjonsprotetikk
  • Bittrehabilitering
• Helse, etikk og estetikk
  • Behandling med dentale keramer
  • Lukelukking og ombyggjing av tenner vha. kompositt
  • Bruk av kjeveortopediske plastskinner og estetisk flytting av tenner
  • Mukogingival kirurgi
  • Om pasientar sitt rettsvern
• Odontologi i samfunnet
  • Særleg tilrettelagt tannhelsetilbod (TOO - tortur, overgrepsutsette og odontofobi)
  • Rettsodontologi
• Yrkesførebuing
  • Valmogelegheiter og arbeidsmarknad
  • Praksisadministrasjon
  • Etikk og god tannlegeskikk
  • Rettslege rammer i eit arbeidsforhold
  • Rettar ved sjukdom, fødsel mm.
• Odontologi i framtida
  • Digitale kliniske hjelpemiddel
  • Kunstig intelligens (KI)

Den teoretiske undervisninga er eit tverrfagleg samarbeid mellom ulike fagseksjonar ved Institutt for klinisk odontologi, Klinisk institutt 1, TAKO-senteret ved Lovisenberg sjukehus i Oslo, Norsk pasientskadeerstatning (NPE) og Den norske tannlegeforening (NTF).

Studentane skal ved avslutta emne ha følgjande læringsutbytte:

Kunnskap

Studenten:

• Kjenner til sjeldne diagnosar, sjukdomar og syndrom, samt ha kunnskapar om følgjetilstandar og problemstillingar for munn og tenner
• Har kunnskap om korleis sjukdom, nedsett helsetilstand, nedsett funksjonsevne, overgrep, tortur eller intellektuell utviklingsforstyrring kan påverke oral helse
• Har kunnskap om tilstandar som kan utgjere ein risiko ved tannbehandling
• Har kunnskap om orale tilstandar som kan påverke andre deler av kroppen og som kan utgjere risiko ved t.d. operative inngrep
• Kjenner til risikofaktorar ved søvnforstyrringar og korleis desse vert behandla
• Har kunnskap om TMD og behandling
• Har kunnskap om samanheng mellom ernæringsstatus og ulike helsetilstandar
• Har kunnskap om prosessane ved karies, slitasjeskader og misfargingar av tannsubstans og korleis dei manifesterer seg i munnhola hos friske og sjuke eldre mennesker
• Har kunnskap om korleis aldring vil påverke endringar i oral helse
• Har kunnskap om spesielt munnstell hos alvorleg sjuke og døyande
• Har kunnskap om ansvarsområda i ulike deler av helsetenesta og om samarbeidet mellom desse
• Har kunnskap om behandlingsprosedyrar ved omfattande orale rehabiliteringar
• Har kunnskap om ulike behandlingsmetodar ved estetisk tannbehandling
• Har kunnskap om indikasjonsområder for ulike typar dentale keramer
• Har kunnskap om etiske retningslinjer
• Har kunnskap om pasienten sin rett/mogelegheit til å klage ved skade eller behandlingssvikt
• Har kunnskap om pasientrettar og tilvisningsinstansar ved behov for tilrettelagt tannbehandling
• Har kunnskap om korleis rettsodontologi kan nyttast i retten si teneste
• Har kjennskap til korleis tannlegen kan være til hjelp ved førespurnader frå politiet
• Har kunnskap om odontologisk identifisering av døde, aldersvurdering av levande der det er tvil om riktig alder og om tannsporundersøkjingar i hud, næringsmidler eller andre objekt, samt undersøkjing av mistenkt gjerningsmann
• Har kunnskap om organisering av tannhelsetilbodet
• Har kunnskap om rettslege rammer i eit tilsetjingssforhold, rettar ved sjukdom, fødsel mm.
• Har kunnskap om tannlegar sine etiske retningslinjer
• Har kjennskap til mogeleg framtidsutvikling innan det odontologiske fagfeltet

Ferdigheiter

Studenten:

• Gjev forsvarleg og tilpassa tannbehandling og munnstell til pasientar som grunna sjukdom, nedsett helsetilstand, nedsett funksjonsevne, overgrep, tortur eller intellektuell utviklingsforstyrring har behov for omfattande og/eller tilrettelagt munn- og tannbehandling
• Kan gjennom anamnese og undersøkjing identifisere tilstandar som kan utgjere helserisiko
• Vurderer og sender vidare til riktig tilvisningsinstans når det er behov for dette
• Kan utføre behandling av TMD vha. bittskinner og kan rettleie pasienten i muskeløvingar
• Kjenner samanhengar mellom kosthald og oral helse hos pasientar med nedsett helsetilstand, nedsett funksjonsevne og/eller utviklingsforstyrring
• Identifiserer tilstandar som kan gje uheldige følgjer for næringsinntak, t.d. som følgje av omfattande kirurgiske inngrep, munntørrhet og svelgjeproblem, tannsmerter mm. hos pasientar med særlege helseutfordringar
• Utfører diagnostisering, førebyggjing, behandling og oppfølgjing av karies, slitasjeskader og misfargingar av tannsubstans i samsvar med den eldre pasienten sine ønsker, behov og føresetnader
• Har forståing av sosiale, kulturelle og aldersrelaterte aspekter som kan påverke førekomst og utvikling av ulike sjukdomar og skader i munnhola hos friske og sjuke eldre mennesker
• Føler seg trygg i ein behandlingssituasjon med eldre, sårbare og sjuke mennesker
• Føler seg trygg i samhandling med demente
• Kan sjølvstendig gjennomføre behandling med immediatproteser eller midlertidige proteser
• Vurderer når ein protese treng justering eller reparasjon og kan gjennomføre prosedyrane for dette
• Kjenner behandlingsprinsippa ved kombinasjonsprotetikk
• Kan vurdere årsaker og behandlingsmogelegheiter ved alvorleg tannsubstanstap med behov for større bittrehabilitering
• Kan gjennomføra enklare estetiske korreksjonar og rettleie pasienten i behandlingsval og -mogelegheiter
• Gjev informasjon og rettleier ein pasient ved iatrogen skade, biverknad, komplikasjon eller reaksjon
• Bistår politiet ved førespurnad

Generell kompetanse

Studenten:

• Integrerer kunnskap frå tidlegare gjennomgåtte fag, gjer heilheitleg klinisk undersøkjing og vurdering av kvar pasient
• Er i stand til å søkje etter og finne naudsynt kunnskap eller informasjon
• Samarbeider med anna helsepersonell
• Samarbeider og samhandlar med pasient og pårørande
• Erkjenner eigne faglege grenser
• Handlar i tråd med lovgjeving, prosedyrar og etiske retningslinjer