Humanistar les Renberg
Ved studiestart kvart år gir Det humanistiske fakultet ei gratis bok til nye studentar og inviterer til forfattarmøte, lesekafé og meire til.
Main content
Alle får ei bok
For å markere starten på eit tilvære som humaniorastudent, inviterer Det humanistiske fakultet til ei felles leseoppleving, der nye studentar kan lese ei bok saman. Ved kvar studiestart blir det difor delt ut ei bok – heilt gratis – til alle nye HF-studentar.
Det blir lesekafé i studenpuben Ad Fontes der ein kan lese og diskutere boka med andre. Studentane får og møte forfattaren både i forelesing og i samtale med fagfolk og studentar.
Dette er tredje året fakultetet inviterer til Humanistar les.
Kvifor les vi?
Humanistiske fag studerer mennesket i verda - i nåtida, fortida og framtida. Kva dei tenkjer, lagar, trur på og drøymer om, korleis dei kommuniserer og har innverknad på verda og kvarandre. Humaniora handlar om kva det vil seie å vere menneske. Studia av alt dette byggjer på skriftlege kjelder.
«Bøker er den viktigaste inngangsporten til humaniora sitt fantastiske faglege univers. Vi humanistar les.», skriv dekan Camilla Brautaset i si helsing til studentane. Som dekan for eit lesande fakultet inviterer ho alle nye studentar til å ta del i lesefellesskapet og oppleve korleis lesing kan opne dører til eit mangfald av ulike humanistiske fag, nye perspektiv og livslange vennskap.
Forfattar og bok
I 2026 er det Tollak til Ingeborg av forfattaren Tore Renberg som er den utvalde boka.
"Dei kallar han Tollak til Ingeborg. Den gamle stabukken som bur oppe ved sagplassen. Alle veit at han har gjort ting på sin eigen måte. Alle veit kva han gjorde med dei gutane. Alle veit at ungane hans ikke kjem heim så ofte. Alle veit han tok til seg han dei kalla Oddotosken. Og alle hugsar den gode kona hans, Ingeborg.
Men det er noko folk ikkje veit. Det er på tide å fortelje."
Romanen fekk Nynorsk litteraturpris i 2020. "Det er ei sterk historie som også kan få lesarane i den nye tida til å elske litteratur", sa juryen den gong.
Det trur vi òg! Bli med og finn ut kva det er Tollak skal fortelje, og gjer deg klar for ei sterk og intens lesaroppleving i lag med dine nye venner og medstudentar.
Kva og når
- Frå 10. august: Hent deg ei bok på Infosenteret på Sydneshaugen skole
- Tysdagar 18.8 til 15.9: Bokkafé utan mobil med bollar og kaffe. Kl. 13–15 på Ad Fontes
- 28. august: Forfattar Tore Renberg kjem til forelesinga på LES100.
- 15. september: Panelsamtale med forfattar, fagfolk og studentar kl. 15-16.30 på Ad Fontes
Les med oss!
«Vi humanistar les. Vi les mykje. Vi les åleine. Vi les saman.
Så kjære nye student, kjære nye humanist: Velkommen til oss. Les!»
Camilla Brautaset, dekan
